Tag-iya sa Rico’s Lechon mitingog

CEBU, Philippines - Mitingog na ang CEO ug founder sa sikat nga kan-anan nga Rico’s Lechon nga si Enrico Dionson duha ka semana ang nakalabay human gipasirad-an ang ilang duha ka sangang establisamento sa Axis Entertainment Avenue, N. Escario St. Barangay Kamputhaw ug sa F. Cabahug St. Barangay Kasambagan ning siyudad.

Niadtong Agosto 2 gipasirad-an ang maong mga kan-anan kay walay business permits ug bisan gihatagan na sila og notisya giingong wala gihapon mituman niini.

Nagpatawag og press conference ang pamilyang Dionson aron ipasabot ang rason kun nganong gipasirad-an ang ilang restaurant.

Gibutyag ni Dionson nga ilang ka-partner sa negosyo sa ilang branch diha sa Barangay Kasambagan ang asawa ni Miguel Osmeña nga si Bea Villegas Osmeña. Si Miguel anak ni Mayor Tomas Osmeña.

Giingong napupos na ang lima ka tuig nila nga kontrata   apan pila ka adlaw sa wa pa kini mapupos ilang gihangyo si Villegas kun mahimo dili na mo-renew pa sa kontrata kay sila na lang sa iyang pamilya ang modumala sa negosyo.

Matud pa dinhi nagsugod ang tanan kay human niini nakadawat na dayon sila og notice to comply, show cause order hangtod gipasirad-an ang ilang kan-anan.

Sigon ni Melanie Grace Oyas, General Manager for Restaurant ang unang notice to comply nadawat nila niadtong buwan sa Hunyo ug ang ikaduhang notice to comply Hulyo ug matud pa daghan na kaayo gidugang nga rekisitos ug gisundan dayon kini og show cause order.

Human madawat ang show cause order nitubag dayon sila niini apan paglabay sa napulo ka adlaw gipadad-an sila og closure order niadtong Agosto 2. Dili hinuon makasulti si Dionson kon kini ba maoy hinungdan nga gigukod sila karon sa siyudad. Ang branch nila sa Kasambagan nagsugod niadtong tuig 2012 ug si Bea maoy matud pa nipasalig nga maoy moproseso sa permits apan sa miaging tuig pa nila nahibaw-an nga temporary permit lang ang naa kanila.

Si Susan Claire Gabuya, General Manager for Corporate Office miingon nga kun dili sila maka-operate og balik bisan nga maka-comply sa mga rekisitos modangop sila sa korte.

Nasuta nga 30 porsiyento ang share ni Bea sa maong korporasyon.

Apil sa gipadad-an og notisya ang commissary sa Rico’s Lechon diha sa Barangay Talamban.

Nahuman na nila ang ilang mga rekisitos ug gipaabot nga isumitir kini sunod semana.

Sigon sa pamilya nga dako na kaayo sila og alkanse ug gatusan sa ilang mga empleyado ang nawad-an na og trabaho.

Sa Official Facebook Page ni Mayor Osmeña iyang gi-post didto, gikwestiyon niini ang kontrata tali sa iyang anak ug daughter-in-law nga matod pa natapos sa buwan sa Hulyo.

Kini miingon nganong napakyas ang pamilyang Dionson pagbutyag nga giingong si Bea nagsige og follow-up sa business permit sukad pa niadtong buwan sa Pebrero.

Kini miingon usab nga dili lang ang Rico’s Lechon maoy iyahang gipasira  tungod kay wala’y business permit.

“ Rico's Lechon, before you slander my family, please get your story straight. Where is this contract with my son and daughter-in-law that ended in July? You are in a CORPORATION together for the restaurant in Mabolo. Corporations expire diay?” pangutana pa sa mayor.

“Why do you fail to mention that my daughter-in-law was following up your business permit since FEBRUARY and that the restaurant pays your family a 5% management fee to take care of all administrative issues including getting a business permit? Why are you saying that my daughter-in-law is responsible for getting the permit? Is this the arrangement you had for the past FIVE YEARS?,” dugang pa sa post.

Matud pa niini, klaro kaayo sa komunikasyon sa Rico’s Lechon ug ni Bea nga nagpahibalo kini nga dili mopabor-pabor ang mayor bisan og asawa pa siya sa anak niini.

Sumala pa sa mayor nga gihatagan og igong panahon ang maong kan-anan aron pag-comply apan hangtud karon wala gihapon. Gikwestyon sab sa mayor kon nganong lahi man ang gipanulti sa kompanya sa ilang gibuhat.

Giklaro niya nga dili lang ang maong tindahan ang gipasiradohan kay walay business     permits.

“Because of your own incompetence, I was forced to shut down a business that is a major source of my own daughter-in-law's income. I even made a post saying that I didn't want to do it, but I had to. 

She was following up for half a year, and now it's her fault?” dugang pa sa mayor.

(BANAT NEWS)