Pekeng PDEA agent patay
CEBU, Philippines - Usa na usab ka lalaking nagpakaaron-ingnong ahente sa Philippine Drug Enforcement Agency-7 ang napusilan patay sa tinuod nga mga ahente sa maong ahensya human giingong nisukol atol sa gipahigayon nga buy-bust operation batok kaniya diha sa H. Borgonia Street, Barangay Mabolo ning Dakbayan sa Sugbo.
Ang nakalas naila nga si Ronald Aznar, 49, taga Sitio Labucay sa maong barangay kinsa giingong nagpaila nga sakop sa PDEA-7. Adunay nakuha kaniya nga uniform (t-shirt sa PDEA) ug gidudahang pekeng mga identification cards sa International Police.
Matud pa ni Leia Albiar, tigpamaba sa PDEA-7 nga ilang nasikop si Aznar diha sa MJ Cuenco Avenue apan gidala sila ni Aznar sa lugar nga diin giingong nagagikan ang iyang suplay sa shabu diha sa H. Borgonia ug may gitudlo kining balay. Sumala pa ni Albiar pag-abot sa maong lugar gikuhaan kini og posas apan giingong kalit gitukmod ni Aznar ang usa sa mga ahente ug gisuwayan og ilog ang armas niini apan napusilan kini sa mga ahente.
Dali kining gidala sa Cebu City Medical Center apan gideklarar kining patay na. Nakuha gikan kang Aznar ang dili mominos 20 ka gramos nga shabu nga mobalor P100 mil, .45 kalibre pistol ug mga bala niini, tulo ka IDs sa “Interpol,” driver’s license, flashlight, bag, telescope ug uban pa.
Si Kapitan Reynaldo Ompoc sa Barangay Mabolo miingon nga wala siya kaila sa maong tawo apan daghan siyag nadawat nga impormasyon nga mao kini ang tighatud og ilegal nga drugas sa maong lugar.
Si PDEA-7 Regional Director Yogi Filemon Ruiz, nitug-an nga ilahang pangitaon kon kinsa pa ang mga kauban ni Aznar ug kung diin gikan ang pekeng uniform niini ug gisusi kon tinuod ba gyud nga mao kini ang pangalan sa namatay. (BANAT NEWS)
- Latest