Gunrunner nadakpan

CEBU, Philippines - Giingong gunrunner sa Dakbayan sa Danao nasikop sa mga sakop sa Provincial Intelligence Branch pinasikad sa search warrant niadtong Miyerkules sa gabii didto sa Sitio Riverside, Barangay Suba sa maong dakbayan.

Ang dinakpan mao si Rommel Tabilid Pinote, 45, residente sa maong dapit.

Matud pa ni Police Regional Office-7 Police Chief Supt. Jose Mario Espino nga ang dinakpan usa ka middleman diin siya ang mangompra didto sa tiggama g’yud og armas nga nag-operate didto sa bukirong barangay sa Danao.

Ang maong search warrant pinirmahan ni Judge Jacinto G. Fajardo sa Regional Trial Court branch 66 sa Dakbayan sa Talisay.

Ang direktor sa Cebu Provincial Police Office nga si Police Snr. Supt. Eric Noble miingon nga adunay nakasumbong kanila bahin sa operasyon ni Pinote hinungdan nga ilaha kining  gipanid-an.

Dihang nakompirmar ang impormasyon mikuha sila og search warrant sa korte. Dugang pa ni Noble nga nagnegosyo usab og lechon baboy si Pinote nga gituohan niya nga ‘front’ lang sa iyang pagpamaligya og armas.

Nakuha sa maong operasyon  ang usa ka kalibre .38 revolver nga dunay serial numbers, napulo ka walay serial numbers nga kalibre .38 revolver, tulo ka kalibre .45 pistols nga dunay serial numbers, 11 ka kalibre .45 pistols nga walay serial numbers, unom ka Black Widow kalibre .9mm nga walay serial numbers ug 19 ka Black Widow nga kalibre .22 nga walay serial numbers.

Duna say nakuha nga 33 ka magazines sa kalibre .45, walo ka magazines sa kalibre .9mm ug 20 ka pares sa hand grip alang sa kalibre .45. Si Pinote dihang gikuhaan og pamahayag sa mga sakop sa media  nagkanayon nga dili niya ikauwaw nga nagnegosyo siya og ilegal nga armas kay dili lang siya maoy namaligya niini kay panginabuhian na kini sa 70 porsiyento sa mga nagpuyo sa ilang lugar.

"After World War 2 kay mao na gyud ang panginabuhian didto (sa Danao)..." si Pinote miingon.

Niasoy sab si Pinoti nga gikan sa tiggama, patungan niya kini og 20 porsiyento apan sukad nga milingkod pagka-presidente si Presidente Rodrigo 'Digong' Duterte, mihinay na ang iyang negosyo hinungdan nga nanaghan na ang napundong armas diha niya.

Matud pa niya nga ang kalibre .45 ibaligya niya og P6 mil samtang ang kalibre .38 mabaligya og P1,900.

Si Espino mibutyag nga ipaubos og ballistic examination ang mga nakuhang armas aron sutaon kon nagamit ba kini sa krimen. Kasong paghupot og ilegal nga armas ang ipasakang kaso batok sa maong dinakpan. (BANAT NEWS)