Magpale uyon sa drug test sa mga estudyante
CEBU, Philippines - Si Bise Gobernador Agnes Magpale kinsa vice chairman sa Provincial Council for the Welfare of Children (PCWC) uyon nga ipaubos sa drug test ang mga tinun-an sa high school. Ug misugyot usab si Magpalae nga kon mahimo i-apil usab sa drug test ang mga lower grade o elementarya.
Kini human nga ang Department of Education (DepEd) mipagawas og guidelines alang sa pagpahigayon og random drug test sa mga estudyante sa high school sa pampubliko ug pribadong eskwelahan.
Gipasabot ni Magpale nga adunay 11-anyos ang nalambigit sa ilegal nga drugas nga naa karon sa My Home Center hinungdan nga buot niyang maapil sa drug test ang mga tinun-an sa elementarya.
Ang My Home Center usa kini ka pasilidad nga gidumala sa probinsiya nga maoy nag-atiman sa mga Children in Conflict with the Law (CICL).
Si Magpale nagkanayon nga importante ang maong drug test aron masayod hilabi na ang mga ginikanan kon nalambigit ba o wala ang ilang anak sa ilegal nga drugas.
Pahimangno sa bise gobernador nga siguradohon sa DepEd nga dili mauwawan ang tinun-an.
Dugang niini, si DepEd Secretary Leonor Briones nagkanayon nga ang random drug test ipahigayon alang sa prevention ug rehabilitation sa mga tinun-an ug magpabilin kini nga confidential. (BANAT NEWS)
- Latest
