Van nilahos sa pangpang, 3 angol

CEBU, Philippines - Grabeng naangol ang tulo ka sakay sa delivery van dihang kalit lang nahagbong sa 15 ka tiil nga gilawmon sa pangpang sa Sitio Magdolinog, Poblacion, Lungsod sa Borbon alas 10 pasado sa buntag niadtong Martes.

Si Senior Police Officer 1 Erwin Pepito sa Borbon Police Station niila sa mga naangol nga sila si Marlon Malait, 34, delivery salesman nga taga Gairan, Dakbayan sa Bogo, mga truck helper nga sila si Meljun Tapang, 23, taga Daanlungsod, ug Jeneviv dela Peña, 24, taga Luy-a, pulos sakop sa Lungsod sa Medellin.

Matud ni Pepito nga nagdagan ang Mitsubishi Fuso Fighter nga nagdala sa plate number nga GJP 363 nga gimaneho ni Sergio Punay, 29, padulong sa amihanang bahin nga kalungsuran. Wala damha nga nawad-an og kontrol ang drayber ug nilahos sa pangpang.

Ang mga biktima nga naglakip sa drayber ang nakabaton og mga bun-og sa kalawasan ug dali nga gidala sa Juan Dosado Memorial Hospital sa Damolog, Lungsod sa Sogod apan gibalhin sa Dakbayan sa Sugbo. (BANAT NEWS)