Tagdumala sa LIV Disco Club Inc. nakugang bahin ni Dong
CEBU, Philippines - Nakuratan ang tagdumala sa LIV Disco Club, Inc. sa Dakbayan sa Mandaue human gilambigit si Kenneth Dong sa ilegal nga drugas.
Gipasalig hinuon sa tagdumala sa maong establisemento nga wala silay kalambigitan kung unsa man ang ilegal nga kalihukan ni Dong.
Matud sa operations manager sa LIV nga si Benray Conti nga legal ang ilang transaksiyon tali ni Dong isip usa sa mga tag-iya.
Gipasabot ni Conti nga si Dong wala nagbase sa Sugbo ug dili direktang nakiglambigit sa operasyon sa establisemento diin aduna siyay minority share.
Andam ang LIV sa bisan unsang imbestigasyon nga himoon sa kagamhanan sa Dakbayan sa Mandaue ug ubang law enforcement agencies.
Gani matud ni Conti nga nakig-alayon sila sa Philippine Drug Enforcement Agency aron pagseguro nga drug–free ang establisemento.
Gihangop sab sa tagdumala sa LIV ang pagklaro sa Mandaue City Hall nga ang establisemento adunay valid business permit hangtud sa Disyembre 31, 2017.
Dugang ni Conti nga ang LIV kusganong nagsuporta sa paningkamot ni Presidente Rodrigo Duterte sa pagsumpo sa problema sa ilegal nga drugas sa nasud. (BANAT NEWS)
- Latest