BJMP-7 personnel dako og kuwang

CEBU, Philippines - Adunay kapin sa 16 mil ka mga piniriso sa tibuok Rehiyon 7 apan wala makaabot og usa ka libo ang mga sakop sa Bureau of Jail Management and Penology sa rehiyon.

Mao kini ang pag-angkon ni Bureau of Jail Management and Penology-7 Regional Director Dennis Rocamora. Matud niya aduna lang silay 776 ka mga jail personnel tibuok Central Visayas.

Matud pa ni Rocamora, ang ilang gidaghanon layo ra kaayo sa husto untang gidaghanon nga  12 mil ka mga jail personnel aron matutukan ang nagkadaghan nga piniriso sa nagkadaiya nilang pasilidad.

Giangkon ni Rocamora ang ilang kakulangon sa tawo maoy hinungdan nga dili malikayan nga adunay makalusot nga mga kontrabando.

Gawas sa kakulang sa ilang mga tawo, kulang usab sila og mga kahimanan alang sa pag-detect sa mga kontrabando nga ipayuhot diha sa mga prisohan.

Apan giklaro ni Rocamora nga bisan pa sa mga kakulangon sa ilang mga gikinahanglan gipaningkamotan gyud nila nga mapakgang ang pagsulod sa mga kontrabando.

(BANAT NEWS)