2 bata napagan, usa naluwas sa libro

CEBU, Philippines - Atol sa binakbakay tali sa kapolisan ug sa gipasanginlang narco-cop nga napatay duha ka manag-ig-agaw ang diriyot mangamatay tungod sa saag nga bala gikan sa duha ka habig nga nagpinusilay niadtong Martes sa gabii diha sa South Road Properties sa Dakbayan sa Talisay.

Nagginukdanay ug nagsinukliay og bala ang mga sakop sa Regional Special Operation Group-7 ug ang suspek nga si PO3 Ryan Martus Quiamco kinsa napatay apil iyang asawa nga si Rizalyn kinsa kauban niini diha sa ilang sakyanan.

Naangol ang usa ka 12-anyos nga estudyante kinsa kauban sa iyang ig-agaw kansang bag nga puno sa libro nangabuslot apan swerteng wala molahos sa lawas ang bala.

Matud pa nga naglakaw ang mga bata pauli sa ilaha gikan sa eskuylahan dihang pag-abot sa eskina sa Sitio Libo, Barangay Pooc nasugatan nila ang nagginukdanay nga mga sakyanan  nga adunay mga armado ug nagpinusilay.

Si Kesha (dili tinuod pangan) niingon nga naigo ang iyang tuo nga batiis atol sa butobuto hinungdan nga nitikuko siya sa ubos apil iyang ig-agaw nga lalaki.

Gidali pagdala sa tambalanan ang dalagita samtang ang ig-agaw niini naluwas tungod sa iyang backpack nga naigo usab og bala apan tungod sa daghang libro ug mga notebooks nitalipsay ang bala ug wala maigo ang lawas niini.

Ang amahan sa bata mitug-an nga pwerte niyang hadloka ug nabalaka human niyang nahibaw-an ang nahitabo sa anak ug sa pag-umangkon apan nakapasalamat gihapon siya kay bisan nasentro ang buko-buko sa iyang anak nitalipsay ra ang balay palayo sa lawas niini paglapos.

Giisip nila nga ikaduha kining kinabuhi sa mga bata. Matud pa sa amahan sa binatilyo kun dili pa tungod sa bag nga napuno sa libro ug notebooks maigo gyud ang kasingkasing sa iyang anak.

Siya nagtuo nga ang nakapanalipod sa iyang anak mao ang Krus nga iyang gibutang sa bag niini.

Ang bata miingon nga pwerte niyang kuyawa pagbutobuto apan wala siya magtuo nga naigo diay og bala ang iyang baga. Nakabantay hinuon siya nga daklit miinit ang iyang bukton nga daw natapsingan o nalagpotan siya og splinter.

Ang mga ginikanan sa mga bata milahos sa Talisay City Police aron magpa-blotter sa hitabo dayon nilahos sa simbahan ug nanagkot aron magpasalamat sa Kahitas-an.

Ang kabanay sa mga bata nanawagan nga unta adunay motabang kanila sa paggasto sa tambal sa dalagita kinsa nakauli na sa ilang balay.

Ang sakop sa Talisay City Police mibisita na sa ilang balay human gimandoan sa PRO-7 aron ipaabot ang ilang hinabang.

Samtang gibutyag sa kapolisan nga konektado sa mga Parojinog didto sa Ozamis City si PO3 Quiamco.

Nadestino kaniadto sa Cebu Provincial Police Office apan na-relieved niadtong Agosto 2016 human kini usa sa gipangalanan ni Presidente Rodrigo ‘Digong’ Duterte nga narco-cops.

"Nakikiramay kami na nadamay ang kanyang asawa," pasabot pa ni Police Regional Office-7 Regional Director Police Chief Supt. Jose Mario Espino.

Butyag sa hepe sa Regional Intelligence Division nga si Police Sen. Supt. Jonathan Cabal nga ilang nahibaw-an nga adto mangompra og shabu sa Ozamis City ang maong polis.

Matud pa ni Cabal kakompetensya ni Quiamco si Manuelito Sencil kinsa napatay usab sa mga sakop sa RSOG-7 human kini gituohang misukol sa nagpahigayon niya og buy-bust operation diha gihapon sa Barangay Lagtang, Dakbayan sa Talisay niadtong Agosto 5, 2017.

"Tumigil sasakyan niya sa Pooc maybe because he was already fatally wounded," matud pa sa maong hepe.

Naangol sab sa maong operasyon ang usa ka membro sa RSOG nga si PO3 Jemmuel Villaflores kinsa nakaangkon og samad pinusilan sa iyang bukton.

Gawas sa duha ka bultong paliton unta sa poseur buyer sa RSOG, duna say nakuhang mga resibo sa usa ka pawnshop nga adunay mga pangalan sa mga aktibong polis nga karon gipaubos na sa imbestigasyon kun duna ba silay kalabutan sa maong negosyo sa magtiayon.

Ipaubos usab sa forensic examination ang mga cellphones sa duha aron pagsusi kun kinsa pa ang ilang mga koneksyon sumala pa ni Cabal.

Butyag pa ni Cabal nga sa habagatang bahin sa Sugbo ang distribusyon ni Quiamco ug konektado usab kini sa drug lord nga si Franz Sabalones kinsa mitahan nang daan sa kapolisan niadto pang nilabay nga tuig. (BANAT NEWS)