Upat nabay-ad sa anti-drug operation

CEBU, Philippines - Upat na usab ka gipasanginlang nalambigit sa ilegal nga drugas ang nangamatay human sa gihimong operasyon sa mga otoridad ug 19 usab ang nangadakpan.

Sa Naga, nakigpinusilay sa mga sakop sa kapulisan sa maong siyudad sila si Michael Pacaña alyas Macky, 35,  nga maoy target sa buy-bust operation ug kauban niini nga si Oscar Encabo niadtong Martes sa gabii.

Matud pa ni PO2 Fernando Mata nga nakabantay si Pacaña nga polis ang iyang gikasabot hinungdan nga dali kining nisibat ug nipabuto sa iyang armas.

Ang iyang kuyog nga si Encabo niapil sa pagpusil sa mga sakop sa mga operatiba apan wala sila makaigo hinungdan sa pagbawos sa mga polis hinungdan sa ilang pagkaangol.

Ang duha daling gidala sa Minglanilla District Hospital apan nakabsan gyud sila sa kinabuhi.  Ang mga operatiba ang nakarekober og .38 nga revolver ingon man mga bala ug .357 Magnum revolver ug mga bala diha sa crime scene.

Laing nakuha gikan sa mga namatay ang upat ka gagmay nga pakete sa shabu ug duha ka motorsiklo. Nagkanayon si Supt. Gregorio Galsim, hepe sa Naga City Police Station  nga lehitimo ang ilang operasyon tungod kay nisukol man ang mga suspek.

Samtang patay usab human nisukol sa mga sakop sa Philippine Drug Enforcement Agency-7 niadto gihapong Martes sa gabii si Roberto Cruzper alyas Bao diha sud sa ilang balay sa Sitio Macroville, Purok 6 Barangay Camputhaw ning dakbayan sa Sugbo.

Matud pa ni Leia Albiar, tigpamaba sa PDEA-7, napatay si Cruzpero kay gipusil niini ang mga ahente nga iyang gibaligyaan og drugas.

Nakuha nila gikan kang Cruzpero ang 10 gramos nga gituohan shabu  ug .38 revolver nga dunay mga bala.

Apan ang inahan niini nga si Alicia miangkon nga drug user ang anak apan dili kini drug pusher. Gani nagpaubos kini sa drug rehabilitation sa lungsod sa Bantayan ug hapit na unta kini mogradwar sa programa, niuli kini kay adunay ayohon.

Samtang kagabii, usa ka Ronald  Capistrano Aznar usab ang napusilan   sa PDEA diha sa Gorgonio St. Brgy. Mabolo atol sa ilang operasyon sumala pa ni kapitan Reynaldo Ompoc sa Mabolo.

 Samtang 19 ka mga tawo ang nasikop sa Danao  City, Dakbayan sa Talisay ug Cordova diin usa ka kanhi barangay konsehal ang nadakpan ug usa ka menor de edad. (BANAT NEWS)