Warden gidayeg, gireklamo

CEBU, Philippines - Gipasidunggan ang pipila ka jail wardens atol sa ika-26 nga anibersaryo sa Bureau of Jail Management ang Penology sa Rehiyon-7 kagahapon. Si Presidential Adviser on Legislative Affairs, Secretary Adelino Sitoy, ang pinasidunggan dinapit sa kalihukan.

Ang gipasidunggan mao sila si Jail Supt. Johnson Calub isip JPA of the Year, Jail Chief Inspector Jose Abueva, District Jail Warden of the Year, Jail Senior Inspector Crisyrel Awe, City Jail Warden of the Year, Senior Jail Officer 4 Neal Rosaroso, Municipal Jail Warden of the Year ug uban pa.

Samtang gipasidunggan sab ang mga unit sa BJMP nga naglangkub sa Bohol Jail Provincial Office isip JPA Office of the Year, Bohol District Jail isip District Jail of the Year, Balamban Municipal Jail isip Municipal Jail of the Year ug Danao City Jail isip  City Jail of the Year.

Gihatagan sab og special nga pasidungog silang Jail Officer 1 Jharice Harah Busano, district paralegal officer; JO1 Rowelen Kinkito, city paralegal officer; Senior Jail Officer 1 Fernando Paer, municipal paralegal officer.

Nigawas sab ang Siquijor District Jail isip Best MSEC, Cebu City Jail Male Dormitory isip Best Inmate Disciplinary Board ug Danao City Jail isip IWD Implementer of the Year.

Gipasidunggan ang mga LGU sa Naga City, Carcar City, Minglanilla, Tagbilaran City, Cebu City, Talisay City, Province of Bohol, Province of Siquijor, Balamban, ERUF, ug uban pa. Matud pa ni Sitoy nga iyang tan-awon ang pagpasar sa balaudnon alang sa integration sa provincial jail ngadto sa BJMP aron mokunhod ang naghuot nga mga piniriso.

Gihangop ni Jail Chief Supt. Dennis Rocamora, regional director sa BJMP-7, ang maong balaudnon.

Matud ni Rocamora nga makatabang kini nga maminusan ang uban nga mga naghuot nga prisohan kay pwede na man ibalhug sa bisan asa nga prisohan nga minus ang sulod.

Samtang dunay gipasidunggan apan usa ka opisyal sa Cebu Provincial Detention and Rehabilitation Center (CPDRC) ang gireklamo sa mga guwardiya tungod sa dili maayong binuhatan.

"Nagsulat mi nganha nimo aron ka masayod nga dili maayo ang gibuhat sa imong Asst. Warden nga si Audesti Miguel," sumala pa sa suwat nga pinetsahan og Hulyo 20, 2017 nga gipadala ngadto kang Roberto “Bobby” Legaspi, ang officer-in-charge sa CPDRC.

Ang maong suwat gipadala sab ngadto kang Gobernador Hilario Davide III, Bise Gob. Agnes Magpale, Atty. Mark Tolentino, ang provincial administrator, Atty. Orvi Ortega, ang chairman sa Committee on Discipline and Investigation (CODI), Office of the Ombudsman-Visayas, Commission on Human Rights ug mga sakop sa media. (BANAT NEWS)