Drayber wa matintal, butang sa turista giuli

CEBU, Philippines - Usa ka matinud-anong drayber ang miuli sa P90 mil nga balor sa mga gadgets nga gipanag-iya og usa ka langyaw nga iyang nahulog sa kalsada didto sa Santander niadtong Lunes.

Giuli sa drayber nga si Floriano Culanag ang usa ka bag nga dunay mga gadgets nga mokabat og P90 mil nga gipanag-iya sa turistang si Gao   Jie, usa ka Chinese National.

Si Culanag miingon nga sa dihang namasada kini dunay usa ka bag nga iyang napalgan kilid sa kalsada nga iyang gipunit ug gidala sa ilang balay.

Sa dihang nakauli na kini, kalit nga ni-vibrate ang sulod sa maong bag hinungdan nga nangahadlok sila sa iyang asawa.

Sa dihang giablihan na kini, didto napalgan ang duha ka relo pang scuba diving, underwater camera, cellphone ug kwarta nga P300.

Matud pa nga si Culanag kinsang dunay tulo ka mga anak nga nag-edad pa og 11-anyos, 5-anyos ug 2-anyos, makakwarta lang og P200 ang adlaw sa iyang pamasada apan sa dihang napalgan niya ang maong mga butang, wala kini magduha-duha sa pag-uli niini sa tag-iya.

Si Culanag midala sa maong bag sa police station ug didto nag-abot sila sa tag-iya nga si Gao ug didto personal niyang gitunol ang bag.

Gitagaan ang maong drayber og ganti sa tag-iya niini isip pahalipay sa maayong gibuhat niini apan wala na ibutyag kon pila. (BANAT NEWS)