Ginang gipatay sa bana
CEBU, Philippines - Asawa giunay og dunggab patay sa iyang bana atol sa ilang panaglalis sulod sa ilang panimalay didto sa Barangay Togonon, Dakbayan sa Danao niadtong Lunes.
Gipatay sa dunggab si Loraine Lawas Capuyan, 24, sa iyang bana nga si Rommel Capuyan, 24.
Matud pa sa imbestigador sa maong kaso nga si PO2 Madette Limpag nagkalalis ang magtiayon kay tulo ka adlaw nga wala mouli ang bana.
Nangangkon ang bana nga nanarbaho kini kay nakadispalko kini og kapin P18 mil. Apan natingala ang asawa kay wala man kini trabaho ang bana ug wala kini maghatagan kaniya og kwarta.
Buntag pa lang gipasidan-an sa ginikanan ang biktima nga di una matulog sa ilang balay. Apan wala mopatuo ang asawa niini ug misalig nga dili kini pasipad-an sa iyang bana.
Apan nianang pagka-kaadlawon nakadungog ang uyoan sa biktima nga nisinggit ug nangayo og tabang maong dali nila kining giadto kauban ang ginikanan sa namatay.
Apan ila na lang nasugatan si Rommel nga nagbitbit og kutsilyo ug gihataan og dunggab ang ugangan.
Sa balay, napalgan na lang nga nagkadugo ang biktima nga dunay samad dinunggaban sa iyang liog ug lima sa iyang buko-buko. Patay na kini pag-abot sa tambalanan.
Ang suspetsado nga si Rommel mitahan sa kapulisan ug matud pa niya nga wala siya magdahom nga napatay niya ang iyang asawa. (BANAT NEWS)
- Latest
