Banat ( Leaderboard Top ), pagematch: 1, sectionmatch: 1

Dakong hotel nga may casino tukoron sa Mandaue City

CEBU, Philippines – Ang Philippine Amusement and Gaming Corporation (Pagcor) mihatag og provisional license ngadto sa Millenium Pan-Asia Hotel and Resort Inc. alang sa pagtukod og dakong hotel nga adunay casino diha sa dakbayan sa Mandaue.

Gipaabot usab nga ang pagtukod niining mao nga hotel makapadugang sa paglambo sa Mandaue kay makadawat na kini og binuwan nga donasyon gikan sa Pagcor, sama sa paghatag niini og P4 milyones kada buwan ngadto sa dakbayan sa Sugbo tungod sa pagtugot nga maka-operate ang gambling casino diha sa Waterfront Hotel sa Lahug.

Ang Pagcor mitugot pag-develop og 300 milyones dolyares nga integrated resort diha sa Mandaue City human pirmahi ang kasabutan nila ni Pagcor Chairman Andrea Domingo ug ni Justin Xiao, ang chief executive officer of Millennium Pan Asia Hotel kaniadtong Agosto 9.

Matud sa kadagkoan sa Pagcor nga una pa kini nga “world class hotel-casino” nga mamugna diha sa dakbayan sa Mandaue ug gipaabot nga hugopan kini sa katawhan kay gawas sa casino, daghang kalingawan ang mugnaon sa hotel, sama sa kan-anan, sinehan, business center ug daghan pa.

Sigon sa kasabotan nga ang hotel paspasan pagtugot aron nga maka-operate na kini sa ikatulong hinapos nga bahin sa tuig 2020. Ang desinyo sa hotel gipaabot nga makadapit gayud og mga dumoduong gikan sa lainlaing dapit sa nasud ug ubang bahin sa kalibutan.

Adunay mga kan-anan nga mo-serve og mga pagkaon alang sa mga Chinese, Korean, ug sa mga Pilipino. Gilantaw usab nga mga upat ka libo ka Sugboanon ang makabenepisyo kay sila makatrabaho sa pagtukod niining mao nga dakong hotel. –RUB (BANAT NEWS)

 

 

 

  • Follow Us: