Duterte: Drugas di na mapugngan

CEBU, Philippines – Gibutyag ni Presidente Rodrigo Duterte niadtong Biyernes sa gabii nga dili na mapugngan ang problema sa ilegal nga drugas karon dinhi sa nasud. Ang iyang pamahayag layo kaayo sa iyang gipanaad niadtong kampanya nga iyang wagtangon ang maong problema sulod lang sa unom ka buwan.

"Sabi ko ang America na America na, hindi nga niya makontrol iyong drugs, tayo pa kaya?" matud pa ni Duterte sa iyang speech  atubangan sa mga medical practitioners sa Davao City sa report sa GMA News.Tv.

Si Duterte namahayag niini atubangan sa mga sakop sa Southern Philippines Medical Center sa Davao City niadtong miaging Biyernes.

Gipasangil ni Duterte sa taas kaayong kabaybayonan sa kaliboan ka mga isla sa nasud ang kalisod sa pagpakgang sa smuggling sa drugas  dinhi sa nasud.

"We do not have the equipment, kulang man. And you know the coastline. How… it's 37,000 iyong-It is not a contiguous place na at least one border lang. Ito island… that's 7,000 islands comprising the Philippine… the Republic of the Philippines," esplikar pa niya.

"Hindi makaya nga ng iba, tayo pa kaya? Iyong drugs na iyan, we can't control it," matud pa sa pangulo nga nikomparar sa kapabilidad sa mga otoridad sa Pilipinas sa ubang mga nasud ilabi na sa Amerika nga aduna say problema sa ilegal nga drugas.

Samtang ang presidente sa League of Municipalities President Democrito Diamante miingon nga nakasabot kini sa gibati sa presidente nga di sayon kining problemaha.

"Bisag intensive na kaayo ang operation for more than a year now,  dili gyud masulbad ang problema sa drugas kung ang mga tawo dili gihapon usbon ilang binuhatan, " matud pang Diamante.

Matud niya kinahanglan dili lang mga polis, public officials ang molihok batok niini kondili hasta ang katawhan batok sa ilegal drugs. 

Samtang si Cebu City Mayor Tomas Osmeña miingon nga husto gyud ang pamahayag ni Duterte ug andam siyang motabang.

"My advice to him is just follow Singapore which has a very stringent death penalty laws with no red tape. If he needs my help, I’m willing to appropriate funds to put multiple death chambers using electric chairs made by Westinghouse," matud pang Osmeña sa The Freeman, igsuong pamantalaan sa Banat News.

Apan dako kaayo ang pagsalig ni Osmeña kang Duterte tungod mao pa kini ang kinagahian nga nakigkombate sa ilegal nga drugas.

Bisan tuod wala matuman ni Duterte ang gisaad nga puohon ang problema sa ilegal nga drugas sa sulod sa unom ka buwan gidayeg gihapon ni Osmeña ang mga nahimo sa pangulo.

"We got no other leader for this. None, Duterte still is the best for the job. No one comes close," dugang pasabot pa ni Osmeña kay nakita niya nga daghan nang druglords hasta government officials nga nalambigit sa sindikato ang na-neutralized.

Apan kon si Police Regional Office in Central Visayas (PRO-7) Director Chief Superintendent Jose Mario Espino maoy pasultihon, siya mipasalig nga wala'y mausab sa ilang gana pakigbatok sa ilegal nga drugas bisan sa pamahayag sa presidente.

Miangkon kini nga lisud gyud pugngan kining padayong pagtaas sa demand sa ilegal nga drugas apan ilahang anam-anamon og putol ang supply niini aron nga bisan pa man motaas ang demand maglisud pagkuha niini.

Atol sa kampanya sa piniliay, gisaad ni Duterte sa mga botante nga iyahang papason ang ilegal nga drugas sa nasud sulod lang sa unom ka buwan kon siya maoy padag-on sa mga tawo.

Apan kapin usa na ka tuig gikan sa paglingkod niini wala kini matuman ug karon miangkon na siya nga dili na gyud makontrolar ang maong problema sa nasud.

Bisan pa niini lapas usa ka milyon ka mga durugista ang nitahan, kaliboan usab ang napatay ug lapas P18 bilyones nga drugas ang nasakmit matud pa sa pangangkon ni Communications Secretary Martin Andanar.

Ning bag-ohay lang, gipangalanan ang iyang anak nga si Davao City Vice Mayor Paulo Duterte diha sa Senate Blue Ribbon Committee hearing kalabot sa pag-smuggle diha sa Bureau of Customs sa balor P6 bilyones nga shabu gikan sa China.

Si Duterte misaad nga mokanaog siya sa pwesto kon adunay bisan usa ka affidavit nga iduso batok sa iyang anak nga naglambigit sa importasyon sa maong ilegal nga drugas.

Apan ang tigpamaba sa Malacañang nga si Ernesto Abella miklaro nga dili lang basta “affidavit” ang gipasabot sa presidente aron siya mo-resign, kondili, dokumento nga magpakitang adunay pinirmahan ang anak sa presidente nga nagdawat kini og payola sa BOC o smugglers. – Camille Pateres ug reports gikan sa The Freeman ug Wires/EIM (BANAT NEWS)