Dakbayan sa Toledo mopalambo sa FSTP
CEBU, Philippines - Ang Toledo City Agriculture Office nagtinguha sa pagpalambo ug pagpalig-on pa gyud sa pagpatuman sa Farmers Scientist Training Program (FSTP) sa siyudad.
Si Julieza Rebucias Cabahug sa city agriculture office mibutyag nga dili moubos sa 30 ka mag-uuma ang mipaubos sa training.
Ang mga farmer scientist mopailawom sa training sulod sa tulo ka buwan ug mopahigayon usab sila og field study sa pagpananom og mais.
Ang mga farmer scientist mipahigayon sa ilang field study diha sa Barangay Cantabaco diin sila nagpahigayon og eksperimento sa pagpatubo sa ilang tanom nga mga mais gamit ang nagkadaiyang klase sa abuno.
Matud ni Cabahug nga human sa tulo ka buwan makita ang resulta sa ilang pananom kon abunda ug malambuon kini.
Sa gipahigayong pagpananom ang mga kawani sa city agriculture office, provincial agriculture office ug opisyales sa Barangay Cantabacco miuban sa mga farmer scientist. Aduna usab unya’y ipahigayon nga phase 2 ug phase 3 nga FSTP.
Si Cabahug mibutyag nga adunay laing hugna sa field study nga gikatakdang ipahigayon karong Agosto 22 niining tuiga diha sa Barangay Matab-ang ug gipangandaman kini sa agriculture office diin ang pagpananom unya og humay ang ilang ipahigayon.
Ang maong training program dako kini og tabang sa mga mag-uuma sa dakbayan sa Toledo sa pagpalambo sa ilang ani o abot. (BANAT NEWS)
- Latest