Bus ug motor nagbangga, angkas tipi
CEBU, Philippines - Patay ang angkas sa motorsiklo dihang ni-overtake sa usa ka multicab ug didto napunta sa usa ka bus nga gipanag-iya sa Cebu City Government sa may national highway sa Sitio Lagang, Barangay Ocaña, Dakbayan sa Carcar alas 11 kapin sa buntag niadtong Biyernes.
Ang nakalas naila nga si James Lei Sumagang, 21-anyos, taga Lungsod sa San Fernando. Samtang ang nagmaneho sa motorsiklo mao ang kauban sa namatay nga si Arnel Udtohan, 20-anyos, taga Barangay Balisong, Lungsod sa Argao.
Ang drayber sa bus mao si Bernardo Estores, taga Barangay San Jose, Dakbayan sa Sugbo ug empleyado sa Siyudad sa Sugbo.
Matud ni Udtohan, gikan sila sa Sibonga kay namista ug nag-inom uban sa iyang mga higala lakip na ang namatay.
Dugang niini nga paingon silang mamauli sa siyudad kay mo-duty sa dihang pag-abot niya sa maong lugar, ni-overtake siya sa multicab apan disgrasya nga didto sila mopaingon sa bus nga nagpadulong usab kanila.
Gibutyag ni Udtohan, sakit kaayo alang kaniya kay siya ang nagmaneho ug amigo niya ang nakalas.
Samtang si Estores sa iyang bahin nibutyag nga ni-overtake ang maong motorsiklo sa multicab ug tuyo unta niya kining likayan apan kay nisarasay ang dinaganan niini, naigo gyud kini sa iyang kilid ug nagrabehan ang angkas nga wala magsul-ob og helmet.
Si Sumagang nakutloan sa iyang kinabuhi diha-diha dayon gumikan sa grabeng kadaut nga naangkon niini.
Gitug-an ni Estores, disgrasya gyud ang hitabo kay nakainom ang drayber sa motorsiklo ug personal na usab siyang niayuda sa pamilya sa namatay lakip na ang iyang mga pasahero nga mibisita sa Birhen sa Lindogon.
Matud ni PO2 Reyjay Amad, Desk Officer sa Carcar City Police Station nga magpaabot sila sa pamilya sa namatay kon mopasaka ba kini og kaso ngadto sa mga drayber nga kasamtangang gikustodiya sa ilang buhatan. (BANAT NEWS)
- Latest