Qimonda gipadad-an og gwardiya

CEBU, Philippines - Nipadala og gwardiya ang kagamhanan sa Probinsiya sa Sugbo ngadto sa Qimonda IT Center kon asa nahimutang ang mga korte sa Sugbo human ni-expire ang kontrata sa Supreme Court ngadto sa security provider niini.

Gibutyag ni Gobernador Hilario Davide III nga mihangyo si Executive Judge Gilbert Moises sa Kapitolyo nga mopadala una og gwardiya sa Qimonda sanglit wala na kini gwardiya.

Hinungdan nga nihangyo ang Kapitolyo ngadto sa GDS Security and Detective Agency, ang security provider sa Kapitolyo nga mopadala og mga gwardiya ngadto sa Qimonda.

“Naa pud employees didto nga puli og bantay pero importante nga naay magbantay didto kay ang mga evidence pud ba,” matod ni Davide.

Dugang sa gobernador nga usa ka bulan lang ang mga gwardiya nga motabang og bantay sa Qimonda hangtod nga makapangita o subling makabutang og gwardiya ang Korte Suprema og security sa nahisgutang edipisyo.

Wala na masayod pa ang gobernador kon nganong wala dayon maka-renew og kontrata ang Supreme Court sa security provider niini apan matod ni Davide nga mas maayo kon hatagan og authority ang mga executive judge nga makasulod og kontrata alang sa mga korte hilabina kon seguridad ang  hisgutan.

Nasayran nga ang ulohang buhatan sa Korte Suprema maoy nisulod sa kontrata niini. (BANAT NEWS)