Bird flu gibantayan sa DVMF
CEBU, Philippines - Gipahugtan sa Department of Veterinary Medicine and Fisheries sa Dakbayan sa Sugbo ang mga manok nga mosulod sa siyudad human sa nitumaw nga bird flu sa Pampanga.
Gitug-an ni DVMF head Dr. Alice Utlang nga nagpahigayon sila og blood sampling sa mga lugar nga adunay migratory birds bisan wala pa ang bird flu nga nahitabo sa Pampanga.
Sumala pa niini, pahugtan pa nila og surveillance ang mga lugar nga adunay daghang manok.
Dugang ni Utlang nga ang mga manok o avian species nga gikan sa Luzon, dili mahimong makasulod sa Visayas ug Mindanao lakip ang mga poultry products.
Awhag niya sa mga namuhi og manok, itik ug pugo nga kon nagsugod na og kasakit ug mamatay, itaho dayon kanila pinaagi sa ilang hotline nga: 09228320631.
Pahimangno usab ni Utlang ngadto sa mga supplier sa paglikay sa pagkuha og mga manok gikan sa Luzon kay ila gyud kining konpiskahon bisan og aduna kini mga papeles. (BANAT NEWS)
- Latest