Banat ( Leaderboard Top ), pagematch: 1, sectionmatch: 1

Ormoc tabangan sab sa Kapitolyo

CEBU, Philippines - Nagplano karon si Gobernador Hilario Davide III nga mohatag usab og hinabang ngadto sa Ormoc City, Leyte human sa iyang pagbisita didto sa Lungsod sa Kananga.

Personal nga gitunol ni Davide ngadto sa mga opisyal sa Kananga ang usa ka milyon ka pesos nga tseke isip financial assistance sa kagamhanan sa Probinsiya sa Sugbo ngadto sa maong lungsod nga usa sa naapektohan sa 6.5 magnitude nga linog nga miigo sa Leyte niadtong Hulyo 6.

Matod sa gobernador nga atol sa ilang pagbisita didto sa Leyte, nag courtesy call usab sila ngadto kang Ormoc City Mayor Richard Gomez kon diin si Gomez nipadayag usab nga ang ilang dakbayan nga naigo sab sa linog, nagkinahanglan sab og hinabang.

“So puhon akong hangyoon ang provincial board (nga mohatag og financial assistance ngadto sa Ormoc)” matod ni Davide kinsa nagkanayon nga base sa gisulti ni Gomez, pipila ka mga residente hilabina sa mga bukirang bahin sa Ormoc ang nanginahanglan gyud og tabang.

Atol sa pagbisita sa gobernador, ila usab nahisgotan ang posibilidad nga mag-alayon ang probinsiya ingon man ang Dakbayan sa Ormoc alang sa capacity building  kon diin ang duha ka lokal nga kagamhanan mopahigayon og joint operations atol sa kalamidad.

Nahisgotan usab sa mga opisyal ang pag-alayon sa disaster response ug climate change adaptation program ug inter-city ug inter-province disaster response. (BANAT NEWS)

  • Follow Us: