Banat ( Leaderboard Top ), pagematch: 1, sectionmatch: 1

BRT Project lisod nang pugngan

CEBU, Philippines - Wa na mabalaka si Cebu City Mayor Tomas Osmeña kon unsay dangatan sa Bus Rapid Transit (BRT) project sa Dakbayan sa Sugbo.

Mao kini ang iyang gibutyag human giaprobahan sa Investment Coordination Committee-Cabinet Committee sa National Economic and Development Authority ang dugang P5.6 bilyones nga pundo sa pag-implementar sa   BRT.

Sa kinatibuk-an, adunay P16.3 bilyones na nga pundong gigahin sa proyekto nga BRT sa dakbayan.

Matud pa sa Facebook post sa mayor nga giaprobahan na sa NEDA ug kinahanglan gyud nga ipatuman ang maong proyekto sa Department of Transportation ang BRT.

Dugang niya nga "kadaugan sa Sugbo," ang pag-aprobar sa NEDA taliwala sa pasiatab ni Presidential Assistant for the Visayas Michael Dino nga dili madayon ang maong proyekto.

Apan matud ni Osmeña nga sa walay duha-duha, buhaton sab gyud ni Dino kutob sa iyang mahimo aron mapugngan ang BRT.

Gibutyag sa mayor nga ang trabaho sa usa ka Presidential Assistant  mao ang pagtabang ug dili ang pagguba sa mga proyekto sa lokal nga kagamhanan.

Si Dino sa iyang bahin niingon nga nagtuo siya nga mamahimo nang susihon pagbalik sa DOTr ang maong proyekto kay naaprobahan na ang budget.

Iyang gidasonan nga ang mga eksperto nagkanayon nga mas makapahuot pa sa dagan sa trapiko ang BRT sa Sugbo.

Inay BRT, niduso si Dino sa Light Railway Transit (LRT) dili lang sa Sugbo kon dili lakip na sa Metro Cebu.

Sa laing bahin, si BRT Project Manager Rafael Yap niingon nga magpadayon ang pag-isyu og notice of taking with final offer alang sa mga nanag-iya og yuta nga maapektuhan sa BRT.

Dugang niya nga ang City's Land Acquisition Committee magpadayon sa pagproseso sa lot acquisition kay mao kini ang mandato sa  Memorandum of Agreement nga gipirmahan ni Osmeña ug sa representante sa DOTr.

Ang siyudad nakadawat na og P900 milyones gikan sa DOTr alang sa unang bahin sa lot acquisition.

  • Follow Us: