Osmeña gikiha

CEBU, Philippines - Nag-atubang og kasong kriminal ug administratiba ang mayor ug ang tresurera sa Dakbayan sa Sugbo human sa pagdumili nila sa pagdawat sa bayad sa mga nakapalit sa yuta sa South Road Properties niadtong tuig 2015.

Si Kapitan Ramil Ayuman sa barangay Apas ang mikiha nilang Mayor Tomas Osmeña ug City Treasurer Tessie Camarillo sa Office of the Ombudsman-Visayas sa miaging Huwebes sa hapon.

Gi-akusahan ni Ayuman silang Osmeña ug Camarillo nga guilty of grave misconduct tungod sa giingong pagsupak sa Section 3 of Republic Act 3019 kon Anti-Graft and Corrupt Practices Act and Code of Conduct and Ethical Standards for Public Officials.  Gihangyo sa kihante nga suspensuhon una si Osmeña ug Camarillo samtang himuon pa ang imbestigasyon batok sa duha ka opisyal.

Matud ni Ayuman nga naalkanse ang siyudad sa gibuhat sa duha ka opisyal nga tinuyo nga wala pagdawat sa bayad sa mga nakapalit sa luna niadtong 2015.  Dugang ni Ayuman nga makatabang unta ang halin sa SRP nga yuta sa pag-implementar og mga proyekto nga makatabang sa ordinaryong Sugbuanon. Sa pakighinabi sa Banat News, matud ni Osmeña nga dili balido ang pagkabaligya sa yuta sa miaging administrasyon.

"City Council passed resolution removing authority of mayor to sign Deed of Sale. Days later, Mayor (Michael) Rama signed among other fatal reasons," sigon ni Osmeña. Gipasupot ni Ayuman ang suwat ni Osmeña ngadto kang Camarillo diin nimando ang mayor nga dili dawaton ang bayad sa mga giant developers sa yuta.

Gani, miadto ang mga representante sa SM, Ayala, ug Cebu Holdings, Inc. sa City Hall aron mobayad. Apan wala kini dawata ni Camarillo.

"Pila gud na ka billions of pesos. I think naka cause og injury gyud sa siyudad. It's high time nga file ang case kay wala dawata sa siyudad ang payment. Nahikawan ang siyudad," matud ni Ayuman.

Kahinumduman nga ang 45.2-hectare nga yuta napalit sa mga giant developers sa kantidad nga P16.7 billion. Niadtong 2015, nakabayad na ang mga kompanya og P8.35 billion ug pag 2016, nibayad ang mga kompanya og laing P3 billion alang sa downpayment.

Sa P3 billion nga downpayment, wala sab kini gipagasto ni Osmeña tungod duna siyay plano nga iuli ang maong kwarta sa mga nakapalit sa yuta.

Nakabayad na og P11 billion ang mga kompanya ug ang P4.5 billion niini nagamit niadtong 2016 sa previous administration.

Matud ni Osmeña nga adunay daghang nalapas nga balaod ang nakalabay nga  administrasyon nga nagresulta sa pagka-void sa pagbaligya sa yuta.

Apan matud ni Ayuman nga pwedeng makiha ang siyudad tungod wala kini motuman sa Deed of Sale on Installment nga napirmahan ni Rama ug mga representate sa mga kompanya. Dugang ni Ayuman nga natuman ang tanang proseso gikan sa public bidding hangtod sa pagpirma sa kontrata.

"Osmeña, as the local chief executive, has engendered undue alarm and concern in the business sector and potential investors, both local and foreign, thereby consequently hampering the economic growth and development of Cebu City," matud ni Ayuman. (BANAT NEWS)