Nisukol napatay

CEBU, Philippines - Patay ang usa ka gikatahapang durugista dihang gikatahong miaksyon og sukol sa mga ahente sa Philippine Drug Enforcement Agency Region 7 nga mipahigayon og buy- bust operation kaniya diha sa Barangay Banilad ning Dakbayan sa Sugbo niadtong Biyernes sa gabii.

Samtang siyam usab ka mga batan-on diin pipila kanila ang nakuhaan og armas ang gidakop sa kapolisan didto sa Sibonga tungod sa pagpamaligya og marijuana sa usa ka bakanteng luna diha sa Poblacion, Sibonga.

Ang napatay sa mga ahente sa PDEA-7 giila nga si Ronie Abellanosa alias Agaw kinsa nakuhaan og 25 ka gramong gidudahang shabu nga mobalor og P125,400.

Nakuha usab gikan kaniya ang mga drug paraphernalia ug  usa ka .357 magnum nga dunay sulod nga lima ka mga bala.

Matud pa sa tigpamaba sa PDEA 7 nga si Leia Albiar nga gisuwayan na kini sa pagpahigayon og drug buy-bust operation kaniadto sa kapolisan apan  nakaikyas.

Samtang, mobalor og P330,400 nga shabu ang nasakmit sa mga sakop sa City Intelligence Branch ato sa managlahing buy bust operation didto sa sitio City Central, Bario Luz ug sa Sitio Ponce Dos, Barangay Carreta sa mao gihapong siyudad.

Sa Bario Luz, nadakpan silang Jeanrose Olimba Carredo alyas Jen-jen, 25, Jollry Lim ,20, ug April Jane Batoon Jumao-as, 19, nga nakuhaan og P295 mil nga drugas. Sa Barangay Carreta, gidakop sab si Wilson Ybanez Bermejo, 44, kinsa nakuhaan og duha ka gagmay nga pakete ug duha ka tag-as nga pakete sa gidudahang shabu diin mokabat na og P35,400.

Sikop sab ang usa ka high value target didto sa Sitio Tangasan, Brgy. Valladolid,  Carcar City nga si Robert Taping Eballe alyas Momo, 32, nga nakuhaan og  unom ka gagmay’ng pakete ug tulo ka medium nga mga pakete sa gituohang shabu nga mokantidad og P191,160.

Sa Sitio Ufeba, Barangay Bulacao gibitik sab sa kapolisan pinaagi sa buy-bust operation si Ricardo Zamora Garcia alyas Ricric, 48, nga nakuhaan og 12 ka paketeng shabu.

Usa ka Val Randon Flores, 27, ug residente sa Bulacao, Dakbayan sa Talisay ang naaktohan sa maong dapit nga naghupot og usa ka pakete sa gidudahang shabu.

Laing nadakpan mao si Griggy Sanapao Quillobe, 35, residente sa barangay Lawaan, Dakbayan sa Talisay kauban nilang Ronjun Bacasmas, 27, ug Roberto Parpan Sanchon Jr. 30, nga nakuhaan usab og ginadiling drugas.

Sa laing bahin, siyam ka mga batan-ong lalaki diin duha niini minor de edad nasakpang namaligya og marijuana sa usa ka bakanteng yuta sa Barangay Poblacion, Sibonga.

Matud pa sa hepe sa kapulisan sa Sibonga nga si Police Chief Inspector Stephen Amamag-id nga  adunay nisumbong kanila nga may mga armadong grupo nga namahuway sa usa ka bakanteng yuta sa maong barangay.

Dali nila kining girespondehan kauban sa mga sakop sa Regional Public Safety Battalion. Nagtuo sila nga mga rebelde ang grupo kay nipwesto man sila sa 'high grounds' dili layo sa police station. Apan sa pag-abot sa mga polis nasuta nga namaligya ra diay sila og marijuana, duha niini nag-edad og 16 anyos ug 17 anyos.

Samtang ang uban giila nga silang Edgar Embalsado, 18, Roderick Barte, 22, Gideon Pail Calonia, James Kirby Burgos, 21, Stephen Sumalinog, 22,  Jade Mora,  18 ug JR Retardo, 18.

Nakuha gikan kanila ang 15 ka pakete sa dahon sa marijuana gikan sa maong grupo. (BANAT NEWS)