Tindero og tubig gipusil patay

CEBU, Philippines - Patay diha-diha ang mamaligyaay og tubig human kini pusila niadtong Huwebes sa gabii diha sa Barangay San Roque, dakbayan sa Sugbo. Ang maong biktima kinsa nakaangkon og usa ka samad pinusilan sa ulo ug tuong kamot nailhan lang sa pangalan nga “Opaw” duna kini gitas-on sa barug nga 5’5, nagsul-ob og tsinelas, cargo shorts nga kolor blue ug polo shirt.

Ang patay’ng lawas sa biktima naa karon sa St. Francis Funeral Homes ug giingong wala pay mga tagtungod ang miangkon niini. Sa imbestigasyon sa kapolisan sa homicide section sa Cebu City Police Office (CCPO) giingong ang mipusil sa biktima duha ka wala mailhing lalake kinsa nagsakay og usa ka motorsiklo.

Hangtud sa oras sa pagsuwat niining balita ang kapolisan wala pay nahipos nga impormasyon sa motibo sa maong hitabo. (BANAT NEWS)