Sinkholes dili angay kahibudngan
CEBU, Philippines - Gitug-an sa Mines and Geosciences Bureau nga normal lang sa Sugbo nga makasinati og mga sinkholes ilabi na nga kasagaran adunay sagol nga anapog ang mga yuta.
Tungod sa nakitang susceptibility sa pag-develop sa sinkholes, usa ka subsidence assessment ang gihimo sa MGB-7 sa tibuok rehiyon 7.
Matud ni Al Emil Berador, hepe sa Geoscience Division sa MGB-7, nga ang pagkusog sa uwan, nagpundong tubig ug mga pagtay-og sa linog, dili na angay kahibudngan kung adunay mapormang mga sinkholes ug dili angayan kahadlokan sa publiko.
Buot sab nila nga matabangan sa pagpahibawo sa mga opisyal sa kagamhanan ug sa mga sakop sa local disaster team aron dali masusi ug mabutangan dayon og mga ali aron malikayan ang disgrasya.
Sa nilabay nga buwan, ang MGB-7 nakatala og 770 ka sinkholes sa Dakbayan sa Sugbo.
Alang sa mas komprehensibong pagsuta kung unsa gyud ang posibleng kalamidad sa lugar, nagpadayon karon ang gihimong vulnerability risk assessment sa MGB-7 diin ila kining ipangapod-apod ngadto sa nagkadaiyang lokal nga kagamhanan uban ang geo-hazard map alang sa pagpangandam ug prevention sa mga posibleng kadaut nga mahitabo. (BANAT NEWS)
- Latest