Anti-dengue vaccine gidagsa sa Talisay

CEBU, Philippines - Gidagsa sa mga ginikanan bitbit ang ilang mga anak sa Barangay Poblacion, Dakbayan sa Talisay ang pagpangbakuna batok sa sakit nga dengue kagahapon.

Si Dr. Rey Ceasar Bautista nga maoy nangulo sa maong kalihukan nibutyag makatabang kini sa mga kabataan nga mabakunahan aron proteksyon nila sa makamatay nga sakit nga dengue.

Apan iyang gipasabot nga bisan pa man og nabakunahan dili gihapon angay mokompiyansa tungod kay mas maayo gihapon nga manglimpyo gyud sa palibot aron malikay sa mga sakit-sakit ingon man lamok. Gikaingon nga ang Pilipinas maoy labing una nga misuway sa anti-dengue vaccine busa ang mga nurses dili basta-basta nga makabakuna.

Kinahanglan pa nilang interbyuhon ang mga bata ug ginikanan tungod kay kun nasakit o aduna’y gipamati ang bata sama sa hubak ang dili angay sa maong bakuna sa kabalaka nga kini mo-trigger sa sakit.

Gani kadtong mga nabakunahan na, ang gipaestambay lang una sa sentro aron obserbahan.

Si Mildred Cabusas, midwife sa Poblacion nagkanayon nga ilang mabakunahan moabot sa 675 ka mga bata nga nag-edad og nuwebe  ngadto sa 14 anyos. Sa ila lang nakatala sila og 16 ka kaso sa dengue gikan sa Enero hangtud na karong buwana.

Ang mga ginikanan nga nahinabi sa mga tigbalita dakong pasalamat sa libreng bakuna batok sa dengue tungod kay sila nabalaka gyud sa ilang mga bata nga mataptan sa makamatay nga sakit nga dengue.

Human mabakunahan ang mga bata magpaabot pa og unom ka buwan ayha siya mobalik aron turokan na sab og balik hangtud sa ikatulong higayon aron makompleto ang pagbakuna. (BANAT NEWS)