Abangan sa Carbon market pasakaan

CEBU, Philippines – Pasakaan sa kagamhanan sa Siyudad sa Sugbo ang stall rental sa Carbon Public Market nunot sa giduso ni Konsehal Alvin Arcilla nga pag-amendar sa Market Code sa siyudad diin ang rental rates wala pa nausab kapin na sa 20 ka tuig ang nakalabay.

Ang presidente sa Cebu Market Vendors Development Cooperative, Erwin Goc-ong, human sa ilang consultative meeting niadtong niaging semana niingon nga pabor ra sila sa plano.

Hinoon giklaro niini nga gradual ang pag-usab sa abangan ug gani ilang giduso ang P6 nga abang matag metro kwadrado matag adlaw gikan sa tag P3 sa dul-an 2,000 ka manindahay nga nag-abang.

Sagad sa mga manindahay nag-okupar og tulo ngadto na sa unom ka metro kwadrado nga stalls. Hinoon dili kini makaapektar sa presyo sa mga palaliton sa Carbon Market.

Samtang si Arcilla niingon nga wala pay presyo nga nauyonan ug ila pa kining han-ayon ug tukion sa konseho. Matud niya nga dili gusto si Mayor Tomas Osmeña nga dalion ang pag-usab sa rental rates aron sab patas sa mga manindahay. -/GMR (BANAT NEWS)