Balay nasunog, kandila nalimtan human sa pangadye

CEBU, Philippines - Naugdaw ang usa ka panimalay sulod sa Flora Vill Subdivision sa Sitio Isoya, Mactan, Dakbayan sa Lapu-Lapu alas 7:05 pasado sa niaging gabii ug nagbilin kini og danyos nga mokabat sa P200,000.

Si Senior Fire Officer 2 James Almasan sa Lapu-Lapu City Fire District Office niila sa tag-iya sa panimalay nga si Rey Vilocis kinsa tua sa gawas sa nasud nagtrabaho apan gipuy-an kini sa iyang inahan nga si Lagrimas Vilocis.

Matud ni Almasan nga ang nataligam-an nga kandila nga gidagkutan sa altar atol sa pagpangadye alas 6 pasado sa gabii ang hinungdan sa pagkasunog. Si Almasan niingon nga wala hinuon nakatapon sa silingang kabalayan sa sulod sa maong subdivision ang kayo tungod sa dali nila nga pagresponde samtang walay kinabuhing nakalas o naangol. (BANAT NEWS)