Suspek sa road rage patangtangan sa lisensiya

CEBU, Philippines - Buot sa biktima niadtong nahitabong road rage sa Archbishop Reyes Avenue, dakbayan sa Sugbo nga suspensuhon ang driver’s license sa suspek. Kini ang gibutyag ni Konsehal Dave Tumulak, chairman sa committee on public order and safety, human nahinabi ang biktima.

Wala una gibutyag sa konsehal ang mga ngalan sa biktima lakip na sa gitumbok nga suspek.

Si Tumulak nihimo og lakang sa pagtabang sa biktima human nakadawat og direktiba gikan ni Mayor Tomas Osmeña dihang nakita ang post sa Facebook.

Giingong gipahunong sa suspek ang sakyanan ug nigawas nga dunay bitbit nga baseball bat ug nibahad nga patyon ang biktima.

Gi-record sa biktima ang hitabo ug ang giingong suspek nihawa apan gisundan siya paingon sa Fuente Osmeña hangtud sa dapit kun asa siya nagpuyo.

Si Tumulak niingon nga ang biktima niadto sa Mabolo Police Station diin kini nagpa-blotter aron mokuha og police report isip suporta sa reklamo nga iyang gisang-at sa Land Transportation Office (LTO) aron ipa-suspenso ang lisensiya.

Hinoon ang biktima dili na mopasaka og kaso  kun mangayo ang suspek og pasaylo.

Giingong ang inahan sa suspek nasayud na sa hitabo ug buot makigtagbo sa inahan aron tukion ang maong insidente. (BANAT NEWS)