Ramirez gipasakaan na og kaso
CEBU, Philippines - Pormal nang gipasakaan og kasong illegal possession of firearms ug kalapasan sa Sec 12 sa Republic Act 9165 ang kanhi mayor sa Medellin ug karon Konsehal Ricardo "Ricky' Ramirez.
Pasado alas 3 sa hapon kagahapon niabot sa Cebu Provincial Prosecutor’s Office si Ramirez uban sa mga sakop sa Provincial Intelligence Branch ug gipaubos kini sa inquest proceeding ni Prosecutor Jerome Abarca.
Ang abogado ni Ramirez nga si Atty. Dax Quijano nagkanayon nga dili sila mo-file og counter-affidavit kay adto nila tubagon ang pasangil sa korte.
Nakuha sa kapolisan ang 33 ka mga ebidensya nga naglakip sa duha ka Armalite rifles, mga pistol nga 45 kalibre, revolvers, .9 mm pistol, airgun ug usa ka sniper rifle.
Si Ramirez nihimakak nga nalambigit siya sa ilegal nga drugas ug ang mga armas nga nasakmit iyaha apan pulos na gubaon ug wala na siyay gana niini.
Si Police Regional Office 7 Regional Director Jose Mario Espino nga nahinabi sa Banat News miingon nga tungod sa nakuhang drug paraphernalia kinahanglang ipaubos sa drug test ang opisyal base sa balaod.
Sumala pa ni Espino, base sa mga impormasyon nga ilang nakaylap usa ka high value target si Ramirez apil na ang usa ka retiradong polis. (BANAT NEWS)
- Latest