13 anyos nakit-an na sa Mandaue

CEBU, Philippines - Human sa unom ka adlaw nga pagkawala, nakit-an na ang 13 anyos nga dalagita kinsa giingong gilugos sa usa ka abogadong brodkaster didto sa Barangay Umapad sa Dakbayan sa Mandaue.

Ang bata didto nakit-an sa balay sa iyang barkada human nga na- trace kini sa Facebook.  Matud ni Atty. Ruphil Bañoc ang manager sa radio station dyHP ang iyang mga kauban ang nakakita sa post sa Facebook  ug gikan didto na-trace ang lugar.

"Facebook na sya, nakita sa atong mga kaubanan, ilang gitan-aw ang background, gitan-aw (ang picture) gipadak-an ang litrato unya makita man na kung asa nag- post,  mao ‘to nga ilang giadto kuyog ang ginikanan sa bata," matud ni Bañoc.

Kagahapon sa buntag, si Konsehal Dave Tumulak maoy nitabang sa bata kuyog ang pamilya padulong sa Punta Princesa Police Station diin kini unang gipa-blotter nga na-missing aron nga i-record nga nakit-an na kini ug dayon midiretso sa buhatan sa National Bureau of Investigation (NBI-7).

Matod ni Tumulak nga ang lokal nga kagamhanan sa dakbayan sa Sugbo dili kini manginlabot sa dagan sa kaso sanglit ang NBI man maoy naggunit niini.

"We would like to reiterate to the public, we don't want to touch on the merit of the case, we are here to support the family,” matud ni Tumulak.

Ang abogadong brodkaster nga si Juril Patiño nag-atubang karon og kasong rape sa piskaliya.

"So far sa among gi-submit.

Para sa amo, okay na, dili ra okay, na naa tay kaso.  It's up to the prosecutors, because we submitted already our findings" matod ni Patricio Bernales Jr., ang regional director sa NBI-7.

Matud niya nga ilang   gisumonan ang suspetsado niadtong miaging semana apan giingong didto na kini motubag sa piskaliya.

"Dili ko mo back out, padayonon gyud nako. Mangita gyud ko og hustisya sa nahitabo sa akong anak," matud sa inahan

Si Patiño sa iyang bahin mihimakak sa pasangil batok kaniya ug miklaro nga wala niya gipasakay ang bata sa iyang sakyanan ug labaw nang dili tinuod nga iya kining gilugos.

Siya mihangyo sa publiko nga dili lang siya pasobrahan pagkondinar ilabi na wala pa siya mahukmi sa alegasyon batok kaniya.

Sumala pa ni Patiño, dili niya mahimo ang gipamasangil batok kaniya tungod kay sulod sa pipila ka tuig niyang gipundar ang iyang naabot karon.

Wala siya masayod kung nganong naabot sa punto nga siya gipasanginlan nga bag-o pa man siyang naminyo ug anaa pa sa honeymoon stage  siya sa iyang asawa.

Gitug-an ni Patiño, dili siya puthaw ug dili siya robot, hinungdan giangkon niya nga nahasol ug apektado siya sa mga pasangil.

Apan malipayon siya tungod kay anaa ang iyang kabanay ug mismo ang iyang asawa nga nakaila kaniya wala gayud misukna kaniya may labot sa panghitabo.

Nalipay usab siya nga nakit-an na ang bata kay basin unya unsay mahitabo niini ug siya   na usab ang mapasanginlan.

Si Patiño, nitug-an nihunong usa siya sa pagpanibya, tungod kay gusto niyang tutukan ang kaso ug nalipay siya nga napasaka na ang kaso sa korte kay matubag niya ang mga pasangil batok kaniya.

"Ato lang gihangyo ang publiko especially sa social media, sa facebook, ang atong mga netizens please avoid sa mga messages nga makapasakit, either sa biktima or sa suspetsado.

Adto na lang sa korte," matud pa usab ni Tumulak.

Sumala pa ni Tumulak nga upat ka tawo ang iyang irekomendar nga makadawat sa ganti nga P100 mil nga gitanyag sa mayor. (BANAT NEWS)