Nasunogan namuyo sa van

CEBU, Philippines - Nagpabilin sa luna nga nasunogan ang pipila ka biktima sa luyo sa Matimco, Subangdaku, Dakbayan sa Mandaue aron maseguro nga makabalik sila sa pagtukod sa ilang balay samtang ang uban temporaryong namuyo sa bakante nga container vans.

Naghatag sab og pagkaon ang Mandaue City Social Welfare Office nga molungtad hangtud sa tulo ka adlaw.

Ang dapit sa nasunogan gideklarar na nga ubos sa state of calamity sa tuyo nga magamit ang pundo sa kagamhanan alang sa hinabang.

Ang presidente sa Association of Barangay Councils sa dakbayan, Ernie Manatad nga mao sab ang barangay kapitan sa Subangdaku, niingon nga mokabat sa 30 ka pamilya nga nagpuyo sa pribadong luna ang hayan dili na makabalik pagtukod sa ilang panimalay. (BANAT NEWS)