NBI-7 mipatim-aw bahin sa rape case

CEBU, Philippines - Nakigtagbo ang mga tinugyanan sa National Bureau of Investigation (NBI)-7 kang Cebu City Councilor Dave Tumulak ug ni Executive Assistant to the Mayor Bimbo Fernandez.

Human ang ginikanan sa 13-anyos nga dalagita nagpakitabang sa siyudad human na-missing ang ilang anak nga giingong gilugos sa usa ka abogadong-brodkaster.

Nagkanayon si Tumulak, Deputy Mayor for Police Matters nga nibisita ang mga ahente sa NBI-7 ug gipahibalo sila nga ipasaka na nila ang kaso batok sa gipasanginlang abogadong-brodkaster.

Kini base sa mga ebidensiya nga ilang nakuha bisan og wala ang dalagita kay giingong nakuhaan na kini og affidavits.

Giingong gipasabot sa NBI-7 ang rason nganong nadugay ang pagpasaka og kaso kay matud pa dili sila buot nga hilaw ug dili kompleto ang mga detalye nga ilang makuha ug basin makaapekto na hinuon kini sa kaso nga ilang isang-at.

Si Fernandez miingon gikan sa P20 mil gihimo nang P100 mil ni Cebu City Mayor Tomas Osmeña ang reward nga ihatag sa siyudad alang niadtong tawo nga makatudlo kun asa ang 13-anyos nga dalagita human kini na-missing sugod pa sa miaging Biyernes. Gipasabot ni Fernandez gipasakaan ang reward tungod kay nabalaka gyud ang siyudad sa nawala nga dalagita.

Dihang gipangutana si Fernandez kun asa kuhaon ang P100,000 nga reward kini miingon siya maoy pabut-on sa mayor apan posibleng anha kini kuhaon sa panudlanan  sa siyudad.

 “Basta kita nagpa-all point bulletin ta sa mga police ug unsa pud tanan. Mas ma-encourage ang mga tawo pagpangita niya (13-anyos) kay mas dako na man ang reward,” sigon ni Fernandez.

Si Cebu City Police Office Director Senior Supt. Joel Doria andam motabang sa NBI sa maong kaso. Gimando na niya ang pagpangita sa bata.

Si Doria miingon nga subayon nila ang mga higala niini ug ang lugar nga mahimong suroyanan niini ug andam usab nilang itago ang mga pangalan sa makatudlo sa nahimutangan sa bata.

Giklaro hinuon niyang wala mag-apas ang CCPO sa ganti  kon dili aron gyud makita ang maong batan-on ug mahatud nila ngadto sa NBI, ug ang makatudlo niini tabangan nila ngadto sa Cebu City Hall.

Samtang gibutyag ni Doria nga wala mapasaka sa kapulisan ang maong kaso tungod kay wala na kini sa ilang balay sa dihang kuhaan unta kini og statement sa kapulisan hinungdan tanang mga impormasyon ilang nahuptan ilaha kining ipaambit sa NBI.

Kagahapong adlawa, adunay mga report nga nasang-at na ang kaso ngadto sa piskalya.

(BANAT NEWS)