P10M drugas gisunog sa PDEA sa punerarya

CEBU, Philippines - Gisunog kagahapon ang mokabat sa P10 milyones nga balor sa ginadiling drugas ug regulated drugs nga expired na pinaagi sa thermal destruction sa Cosmopolitan Funeral Homes sa dalan Junquera, Dakbayan sa Sugbo.

Matud ni Ricardo Quinto, deputy director-general sa Philippine Drug Enforcement Agency, nga unang higayon sa Dakbayan sa Sugbo nga nisunog sila sa mga drugas, marijuana ug mga tambal gamit ang maong pasilidad.

Kini aron mapakita sa katawhan nga sila sa PDEA walay gi-recycle gikan sa ilang mga sinakmit tungod kay ila man gyud kining sunogon basta aduna nay court order ug gipasaksihan sab kini sa mga sakop sa media.

Ang gisunog naglangkub sa P8 milyones kapin nga balor sa drugas nga gisurender sa korte ug P1.5 milyones kapin nga balor sa expired nga tambal.

Matud ni Judge Mory Nueva sa Cebu City Regional Trial Court Branch 13 nga aduna nay final judgment ang gipangsunog ug dili na kini magamit nga ebidensiya.

Gitug-an ni Nueva nga ang mga gipangsunog kagahapon positibo kini nga mga drugas human sa random nga pagsusi.

Ang plant operation manager sa Dychangco Group of Companies, Engr. Elbert Ebo, nitug-an nga ang ilang gihimo sa pagsunog kabahin sa ilang corporate social responsibility diin libre nilang gipagamit ang pasilidad.

 Ang thermal destruction walay aso nga mogawas ug tanan nga isulod niini hingpit gyud nga hilison. (BANAT NEWS)