Konsehal ramirez gidakop

CEBU, Philippines - Kanhi mayor ug karon konsehal Ricardo “Ricky” Ramirez sa lungsod sa Medellin ang gisikop sa mga tinugyanan sa Provincial Intelligence Branch sa Cebu Provincial Police Office nga gipangulohan ni Police Supt. Joie Yape kauban sa Medellin Police Station, Regional Intelligence Branch, Philippine Drug Enforcement Unit.

Ang pag-aresto kaniya natigayon pinasikad sa implimentasyon sa Search Warrant sa panimalay niini diha sa Sitio Lucha, Caputatan Sur sa maong lungsod batok sa kampanya sa mga loose firearms.

Matud pa ni Police Regional Office 7 Director Jose Mario Espino ang pagkasikop nila kang Ramirez, kabahin sa pagsunod nila sa kamandoan ni President Rodrigo Duterte nga hingusgan ang kampanya batok sa ilegal nga drugas ug dakpon ang mga dagkong tawo nga nalambigit niini.

Sumala pa ni Espino, si Ramirez usa sa mga high value targets human kini nalambigit sa pagpamaligya ug paggamit og ilegal nga drugas.

Nakuha gikan kang Ramirez ang duha ka M4/M16 with telescope; 8 ka steel magazine  ug mga bala; usa ka .30 caliber Carbine rifle; usa caliber .22 rifle nga adunay telescope, duha ka air gun;  usa ka kalibre .45, usa ka magazine sa kalibre 45 ug mga bala; usa ka .9mm caliber pistol ug usa ka magazine .9mm ug mga bala; assorted magazines sa caliber .22 ug mga bala; assorted empty shells; assorted drug paraphernalia ug usa ka lisensya sa armas.

Dugang pa ni Espino, wala makuhai og drugas si Ramirez tungod kay matud niya ang susama niya dili modala og drugas sa iyang panimalay aron dili masakpan.

Ipaubos usab sa ballistics test ang mga armas nga nakuha aron pagtino kun wala ba kini magamit sa mga krimen.

Gibutyag ni Espino, ipaubos pa nila sa imbestigasyon si Ramirez sa uban pa nga mga kalambigitan niini diha sa iyang lungsod ilabi na kabahin sa ilegal nga drugas.

Awhag ni Espino sa mga nalambigit sa ilegal nga drugas ug niadtong naghupot og mga armas nga mga elected opisyal nga motahan sa ilang kaugalingon kay bukas ang ilang buhatan, basta makigtambayayong lang kini kung asa ug kinsa ang tinubdan sa ilang mga armas ug drugas.

Si Yap sa iyang bahin nitug-an nga dul-an sa tulo ka bulan ang pagpaniid nila kang Ramirez, human nibuto ang pangalan niini nga aduna kini mga armas. Siya midugang nga matag aduna silay madakpan mogawas pirme ang pangalan niini nga nalambigit sa ilegal nga drugas.

Pasakaan og kasong illegal possession of firearms and ammunitions ug possession of drug paraphernalia si Ramirez.

Si Ramirez sa iyang bahin nasagmuyo nga wala patalinghugi ang iyang hangyo nga dili lang siya posasan tungod kay wala man siyay tinguha nga moikyas.

Gibutyag ni Ramirez, walay drugas nga nakuha gikan kaniya ug ang drug paraphernalia iya kadto sa kanhi niya sinaligan nga kalit nilayas human nangawat og butang sa iyang balay nga iyahang gipasakaan og kaso.

Sumala pa ni Ramirez, wala niya na renew ang lisensya sa pipila ka armas kay dili na man kini niya magamit ug pulos na niungot samtang ang mga bala nga nakuha sa iyaha puros mga basiyo tungod kay iyang gitigum samtang nagpahigayon og practice shooting.

Si Medellin Mayor Joven Mondigo Jr. mitambag kang Ramirez nga atubangon ang kaso.  Nagkanayon kini nga dugay ra nga gihugonhugon nga adunay kalambigitan sa ilegal nga drugas  si Ramirez.

“Actually kani siya, tungod sa nahitabo karon. Dugay na kayo nga estorya -estorya sa taga Medellin, naa man mga ideya ang mga tawo, dili man kaayo dako ang lungsod,” matud ni Mondigo.

Si Mondigo nagkanayon nga ilang tun-an karon kung mopasaka ba sila og kasong administratiba batok kang Ramirez apan naglikay gyud sila nga mapolitika kini. (BANAT NEWS)