Paghapsay sa trapiko sa siyudad palambuon

CEBU, Philippines - Mipasalig ang Cebu City Transportation Office (CCTO) nga ipadayon nila ang pag-implementar sa mga buluhaton nga makatabang alang sa hapsay nga dagan sa trapiko sa siyudad.

Matud sa Operations Head sa CCTO Francisco Ouano ilang tumanon kining direktiba ni Presidente Rodrigo Duterte atol sa State of the Nation Address (SONA) niini niadtong adlaw’ng Lunes.

Atol sa SONA ni Presidente Duterte kini miingon: “I am directing the MMDA and the LGUs of Metro Manila, as well as the LGUs of Metro Cebu and all our regional centers to ensure the free flow of traffic, and immediately clear our roads and thoroughfares of all unnecessary obstruction, including vehicles parked on the streets/barrier.”

Sigon ni Ouano ang ilang buhatan mihimo og lakang aron masiguro nga  bisan og trapik magdagan gihapon ang mga sakyanan.

Apan siya miawhag nga kinahanglang mokooperar usab ang publiko ilabi na ang mga motorista pinaagi sa pagsunod sa mga lagda sa trapiko.

Nakita niya nga daghang mga drayber ang padayong wala motahod sa mga lagda sa trapiko kay sa pagkakaron misaka man ang koleksyon nila sa mga multa sa mga badlungong drayber.

Ang CCTO nakakolekta og P57.8 Milyones gikan sa buwan sa Septiyembre sa miaging tuig hangtud sa buwan sa Mayo ning tuiga. Sa pagkakaron gipangusgan nila ang clamping operations sa mga sakyanan nga ilegal nga gi-park sa mga sidewalks ug kadalanan.

Bisan wala pa ang direktiba ni Duterte si Ouano miingon ang CCTO mihimo og pamaagi aron mapalambo ang sitwasyon sa trapiko sa Cebu City subay sa kamandoan sa mayor.

Gipaabot sa CCTO ang dugang 100 clamps sa sunod buwan diin 30 niini alang sa mga truck ug ang laing 70 sa mga four-wheeled vehicles.

Nagtinguha usab ang CCTO nga i-upgrade ang traffic lights sa siyudad sunod tuig dungan sa implimentasyon sa Cebu Bus Rapid Transit. Samtang si Osmeña andam motuman sa direktiba ni Duterte apan sa ‘case to case’ basis. (BANAT NEWS)