Mga gi-junk nga sakyanan sa siyudad ibaligya
CEBU, Philippines - Ipamaligya sa kagamhanan sa siyudad sa Sugbo ang mga sakyanan nga naa sa ilang junkyard nga dili na gyud mapahimuslan pa.
Matud sa pangulo sa General Services Office (GSO) Ronald Malacora, nagpahigayon sila og clearing sa junkyard ug nahibaw-an nila kun pila ka mga sakyanan ang dili na gyud magamit.
Miabot 206 ka units ang giingong dili na gyud mapuslan samtang 122 niini ang angay na lang ipatimbang.
“Ang junkyard gyud nato is atua sa karaang motorpool but ang mga junks atubangan sa DPS ug luyo sa among building kay katag-katag man na sa una gud.
Karon akong plano nga usahon na lang gyud na unya aside sa identification sa unit naa sad tay inspection nga buhaton kung dili na ba gyud siya magamit base sa atong lista ba, unserviceable unit ba gyud na siya or pwede pa ma-repair, kanang 122 nga atong identify wala na gyud na, patimbang na gyud na,” sigon ni Malacora.
Ang maong mga sakyanan gilangkuban sa multicab, awto, Mitsubishi Adventure, Toyota Innova, mga mini dump trucks, dumptrucks, compactor trucks ingon mga heavy equipment.
Gipasabot ni Malacora gihimo nila karon aron ang siyudad makakwarta ug ikaduha aron usab mapuslan pa ang masalbar kay kun pasagdan mosamot kini og kaguba ug mobarato ra ang kantidad niini.
Kun mahuman nila pagsubay ang tanan, ilang ipadala sa Commission on Audit ang report aron makapangayo og pagtugot sa ilang tinguha pagbaligya niini. (BANAT NEWS)
- Latest
