UN lecturer moanhi sa Sugbo
Ang Advocates of Living Values Education (ALIVE) nga gipangulohan sa ilang presidente, Dr. Nancy Berame (wala) ug chairman nga si Dr. Ester Velasquez (ikaduha gikan sa tuo) nipahibawo atol sa press conference sa dako nilang kalihukan ugmang adlawa kabahin sa Climate Change. Gregg M. Rubio
CEBU, Philippines - Moabot sa Sugbo ugmang adlawa ang giilang international lecturer sa United Nations (UN) Climate Change conferences aron mamulong kabahin sa Climate Change.
Si Mr. Golo Joachim Pilz gidapit sa Advocates of Living Values Education (ALIVE) nga mamulong kabahin sa global warming ug solar energy sa Casino Español de Cebu alas 6:00 hangtud alas 8:00 ugma sa gabii
Si Pilz ang adviser sa Renewable Energy, Brahma Kumaris & World Renewable Spiritual Trust (WRST) sa nasud sa India.
“To make this Earth a better place, it needs more than just using renewable technologies or create good strategies. We have to change ourselves, change our consciousness and attitudes,” matud ni Pilz sa iyang pamahayag.
Matud sa presidente sa ALIVE, Dr. Nancy Berame, nga ang kalihukan tambungan sa 150 ka opisyal sa foreign consulates sa Sugbo, mga ahensiya sa gobiyerno ug ubang mga lider. Kini hiniusang paningkamot sa Brahma Kumaris Philippines Spiritual Foundation, The Inner Space, Prosel Pharma, Rotary Club – Gloria Maris, Rotary – Mactan, Zonta Club Cebu-1 ubos sa ALIVE.
Subay usab kini sa 17 Millennium Development Goals sa UN ilabi na sa Goal #13 nga mao ang Climate Action.
Si Golo ang nagtukod sa “IndiaCare” ug nagdesinyo sa “India One”, usa ka 1MW solar thermal power plant sa Shantivan Campus sa Brahma Kumaris/WRST.
Ang chairman sa ALIVE, Dr. Ester Velasquez, naglaum nga ang mga moapil sa kalihukan makakat-on sa mga gihimo ni Pilz sa India ug ang mga partisipante ang motudlo usab ngadto sa katawhan sa mga maayong buhaton nga maangkon ang kalimpyo sa palibot ug kinaiyahan. (BANAT NEWS)
- Latest
