Gikan bilar patay, enforcer namusil

CEBU, Philippines - Lalaki nga gikan nibilar og haya gipusil patay sa wala pa mailhing mamumuno nga sakay og motorsiklo sa Sitio Guiwanon, Poblacion, Dalaguete niadtong Domingo sa kadlawon.

Ang biktima giila nga si John Christopher Ereño alyas Bangkong, 26-anyos, residente sa maong dapit.

Matud ni SPO1 Rodrigo Teo nga gikan nagbilar sa patay ang biktima sa ilang silingan ug matud pa nga ni-text kini sa iyang suod nga higala nga si Vicente Carubio aron kuhaon siya sa motor.

Asoy ni Carubio nga mismo ang biktima ang nagmaneho sa motor samtang nag-angkas ang higala niini.

Matud ni Teo nga nihunong ang duha sa usa ka siradong tindahan dili layo sa ilang panimalay aron utingkayon ang naguba nga cellphone.

Nitug-an si Carubio nga sa mingaw nga kadlawon, duna siya nakit-an nga nagpadulong nga itom nga motor diin nag-bonnet ang duha nga sakay niini.

“Gisyagitan kuno niya (si Carubio) ang biktima nga pagbantay kay mibunot na og pusil ang angkas. Nidagan kuno dayon siya (si Carubio) unya nisyagit ang biktima gipusil,” matud ni Teo.

Nakadungog ang amahan ug kapuyo sa biktima sa walo ka sipang buto ug ang pagsyagit ni Carubio hinungdan nga dali nga nigawas ang duha ug napalgan nga nagbuy-od na ang biktima atubangan sa tindahan nga adunay mga samad pinusilan ug walo ka kabhang sa bala sa kalibre .45 ang nakaplagan sa maong lugar.

Dali nga gidala sa tambalanan ang biktima apan gideklarar nga dead on arrival.

Samtang usa ka 56-anyos nga traffic enforcer sa Lungsod sa Cordova nipusil sa 48-anyos nga manghud tungod sa lalis sa basura sa Purok 2, Barangay Gabi.

Ang suspek giila nga si Mario Bentulan Pogoy, 56, samtang ang biktima giila nga si Benjamin Bentulan Pogoy, 48-anyos.

Matud ni SPO1 Elizar Llanes nga ang anak sa suspek gibadlong sa biktima tungod sa pagkatag sa ilang basura apan nilaban ang suspek sa anak.

Napikon ang suspek ug kaupat gipusil ang biktima sa iyang tiyan ug paa gamit ang iyang kalibre .45.

Ang biktima gidala sa Vicente Sotto Memorial Medical Center sa Dakbayan sa Sugbo.

Anaa na sa maayong kahimtang ang biktima samtang ang suspek ang natanggong sa Cordova Police Station.

Gumikan sa expired na nga lisensiya sa armas, kasong frustrated homicide ug illegal possession of firearms ang atubangon sa suspek. (BANAT NEWS)