Nagpatay sa magtiayong ‘asset’ nailhan

CEBU, Philippines - Nailhan na sa kapolisan sa Siyudad sa Talisay ang nagpatay sa magtiayong gidudahang asset sa mga awtoridad.

Si Senior Insp. Albert Quilotorio, deputy chief sa Talisay City Police Station, nibutyag nga usa ka tawo ang ilang gisunod-sunod karon nga maoy responsable sa pagpatay nila ni John Agustin ug ni Gerlyn Abesia.

Hinuon si Quilotorio nihangyo nga dili lang una nganlan aron aduna pa sila’y higayon nga masikop ang ilang gipangita.

Siya nagkanayon nga nakonsensiya ang tawo nga nakakita sa panghitabo hinungdan nga niduol kini kanila ug nisumbong kun kinsa ang nagpusil sa magtiayon.

Sa ilang imbestigasyon nasuta nga gidudahan nga asset si John Agustin apan wala pa hibaw-i kun asa nga yunit. Nilutaw sab ang report nga aduna’y operasyon sa Barangay Tangke diin nakasibat ang suspek nga posibleng maoy nagpapatay sa magtiayon.

Ang magtiayon gipatay samtang sila natulog sa ilang barong-barong sa Sitio Tunga, Barangay Tangke, Dakbayan sa Talisay.

Gihulagway nga buotan si John Agustin ug kugihan sa iyang trabaho isip job order nga kawani sa Talisay City Hall. Ang iyang labaw ang gisayangan sa iyang pagtaliwan tungod sa iyang kamaayo nga empleyado. (BANAT NEWS)