CCCI pabor sa Uber, Grab
CEBU, Philippines - Nakadawat og tubag si Cebu City Mayor Tomas Osmeña gikan sa Cebu Chamber of Commerce and Industry (CCCI) kalabot sa suwat nga gipadala nga nag-awhag nga mohimo og baruganan kalabot sa isyu sa Transport Network Vehicle Services (TNVS) ilabi na sa Uber ug Grab.
Ang CCCI nipadayag sa ilang suporta mahitungod sa kontrobersiyal nga TNVS.
Ang presidente sa CCCI, Melanie Ng, niingon nga ang officers ug board of trustees sa Chamber mosuporta sa tinguha sa mayor nga makahatag og dugang business opportunities sa katawhan sa Siyudad sa Sugbo.
Nalatid sa suwat nga suportado nila ang TaVNS sa ilang kawsa nga makahatag og serbisyo sa liboan ka sumasakay matag adlaw sa siyudad aron pagpalambo sa ekonomiya.
“We are pleased to inform you that CCCI through its Officers and Board of Trustees has unanimously moved and resolved to support your esteemed goals and aspirations of providing more business opportunities to the greater masses of the people in Cebu City where one of these is the operationalization of the TNVS particular in the services of Uber and Grab,” tipik sa suwat sa CCCI.
Matud nila nga ang maong sakyanan nga nigamit og digital technologies naghatag og mas nindot ug tulin nga serbisyo sa komunidad pinaagi sa limpyo, komportable ug luwas nga sakyanan nga dunay authorized ug certified drivers nga nitamod sa good manners and right conduct.
Supak hinoon sila sa unauthorized colorum drivers nga nagdagan sa kadalanan nga wala’y mga rekisitos ug nakalapas sa franchise agreement ug wala motuman sa gipangayong rekisitos sa Land Transportation Franchising and Regulatory Board (LTFRB).
Nakadayeg ang CCCI sa programa ni Osmeña nga naghatag og importansiya sa pagpalambo sa mga small ug medium enterprises sa siyudad. (BANAT NEWS)
- Latest
