Malinawong rally gipaabot sa PRO-7
CEBU, Philippines - Mipasalig ang direktor sa Police Regional Office-7 Regional Director Chief Supt. Jose Mario Espino nga mamahimong hapsay ang ikaduhang State of the Nation Address (SONA) ni Presidente Rodrigo Duterte karung adlawa human sila makighinabi sa mga grupo sa aktibista arun masabutang dili magmugna og dakong kagubot.
“We don’t expect that kasi kausap ko iyung sectoral and they have down their flags, the practice we have done yesterday, to be sure if ever eventualities, the police know how to dispersed the crowd without iyung real confrontation, iyung nakikita natin sa TV sa NCR hindi mangyayari dito,” matud pa sa maong direktor.
Ang Sugbo naila na nga kalmado bisan sa panahon nga adunay mga kakulian sa politika didto sa kaulohan.
Ang tigpamaba sa CCPO nga si Chief Inspector Ramoncelio Sawan miingon nga ipakatap ang mga pulis sayo sa buntag.
Gipaabot nga karong adlawa, adunay ilusad nga mga lihok protesta ang mga militanteng pundok dinhi sa Sugbo.
Si Konsehal Dave Tumulak, Chairman sa Committee on Public Order and Safety miingon nga gitugotan gihapon sa siyudad ang mga militante nga makahimo og rally kay katungod man nila ang pagpadayag, apan kinahanglan nga dili sila magtisok og kasamok. Ang mga raliyista anha magtapok sa dalan Colon isip holding area. Ug apil sa ilang yangungo mao ang kabahin sa pamuo, transportasyon ug ang martial law extension.
Ang pangulo sa Cebu City Transportation Office (CCTO) Francisco Ouano miingon moabot sa kapin usa ka gatos ka mga traffic enforcers ang ipakatap nga bahinon sa tulo ka shifts.
Sa Talisay City, si Sr. Insp. Albert Quilotorio, deputy chief sa Talisay City Police Station nagkanayon nga bisan og dili sentro ang siyudad sa mga rallies mag-deploy gihapon sila og daghang polis sa kadalanan ug ipatuman ang police checkpoints. (BANAT NEWS)
- Latest
