Konsehal: wala gilawog ngadto sa NPA

CEBU, Philippines - Kusganong gihimakak sa konsehal sa Guihulngan City nga si Edison Dela Rita ang nanggawas karong mga pagduda nga may koneksyon siya sa mga rebeldeng komunista ug iyang gilawog ang mga polis ngadto sa mga New People’s Army hinungdan sa ilang kamatayon apil na niini ang chief of police nga si Supt. Arnel Arpon .

Sa interbyu kaniya diha sa iyang balay sa Poblacion, Guihulngan City si Dela Rita mipaabot sa iyang pahasubo sa mga pamilya sa mga nakalas ug siya miingon nga dili siya makaako nga ilawog ang maong mga polis ngadto sa mga rebelde.

Matud pa niya, gibubo niya ang iyang kinabuhi sa panerbisyo sa gobiyerno diin nahimo siyang barangay kagawad su’d sa tulo ka termino, tulo ka termino sa pagka-barangay kapitan ug karon nahimo siyang konsehal sa siyudad.

Sumala pa niya wala siya’y rason aron pasakitan ang mga polis ug paantuson hasta ang ilang mga pamilya. Matud pa niya, si Arpon mismo ang mipasidaan kaniya sa miaging buwan nga apil siya sa naa sa listahan sa mga target nga patyunon sa CPP/NPA.

Ang maong listahan giingong na-recover sa mga tropa sa Philippine Army sa engkwentro kaniadto. Apil matud pa sa listahan ang planong pag-atake sa tulo ka police stations sa amihanang bahin sa probinsya sa Negros, usa niini ang Guihulngan police station.

Matud niya, nakalingkawas lang siya kay niambak silang duha sa iyang laing kaubang drayber padung sa pangpang, apan ang usa niya ka drayber nga si Michael Jambalos naigo nang daan. Nakaangkon siya og mga bun-og, pangos ug samad-samad sa ulo ug kalawasan.

Si Dela Rita padung sa Barangay Balugo diin nahimutang iyang humayan ug baboyan luwan sa motorsiklo, samtang si Jambalos sa pikas motor kay nagkarga kini og mga pagkaon.

Matud niya, pag-abot nila sa Sitio Mandi-e duha ka batan-on ang ilang nakita sa daplin sa dalan mao nga iya dayong giingnan ang drayber sa pag-alisto. Dihang duol na sila, kalit nga nibunot og armas ang duha ug diretsong namusil kanila ug nakadungog pa siya nga nisinggit ang usa og “banat!” Swerteng wala sila nangaigo sa iyang drayber ug dali silang nakaambak sa pangpang apan si Jambalos nibawos gamit ang cal. .45 pistol niini. Dali siyang nitawag kang city administrator Gino Mijares ug gisultihan kini sa nahitabo ug kun mahimo ma-rescue silang duha, alas 10 na kadto sa buntag.

Pagka-alas 10:30 nakita niya nga may unom ka polis nga nagsakay og motorsiklo apan dihang mogawas na unta sila sa gitagoan kalit silang nakadungog og sagunson nga mga buto maong nibalik sila pagtago.

Alas -3 na pasado sa hapon dihang nabantayan nilang daghan na ang mga tawo uban sa reinforcements ug rescuers, usa kanila si City Councilor Felomino Reyes, chairman sa peace and order committee sa konseho kinsa mitabang pagdala sa mga biktima sa tambalanan.

Si Vice Mayor Ernesto Reyes miingon nga motabang ang siyudad sa pamilya sa mga nangamatay. Gihulagway niya nga kadto maoy kinagrabehang ambush sa iyang lugar sud sa 60 ka tuig na niyang panerbisyo.

Matud pa sa bise mayor nangahadlok karon ang mga tawo sa siyudad ug nabalaka silang maapektahan ang turismo nga maoy ilaha karong gipangusgan nga palambuon.

Gibutang karon isip officer-in- charge ang PNP deputy provincial director for operations si Supt. Carlos Lacuesta kinsa nasuhito sa lugar kay nahimo kining hepe kaniadto sa maong dapit ug taga diha usab ang asawa niini.

Nianang pagkahapon sa samang adlaw, usa ka pagpamusil ang nahitabo diha sa Barangay Poblacion dili layo sa police station hinungdan sa kalisang sa mga tawo.

Ang biktima mao ang usa ka Glenn Absin, 28, residente  sa Plaridel Street sa maong barangay kinsa kauban iyang 4-anyos nga anak ug asawa padung sa usa ka barberohan.

Tulo ka lalaking nag-bonnet ug armado ug gituohang Uzi sub-machine pistols ug kalibre .45 ang mirakrak sa biktima atubangan sa asawa ug anak niini.

Ang amahan sa namatay gikatahong boluntaryong mitug-an nga presidente sa Student Government sa eskuylahan niini kaniadto ang anak apan wala kini malambigit sa ilegal nga drugas. Apan si Bise Mayor Reyes miingon nga dunay police record ang biktima kaniadto dihang aktibista pa kini, apan nagtuo siyang wala kini koneksyon sa ambush sa unom ka polis. (BANAT NEWS)