Positibo sa drugas nga traffic enforcers makabalik pa
CEBU, Philippines - Mahimong makabalik sa serbisyo isip sakop sa City of Talisay-Traffic Operation Development Authority (CT-TODA) ang unom ka kanhi sakop nga nahibaw-an nga tiggamitan og ginadiling drugas atol sa drug test.
Apan si Almond dela Peña, pangulo sa CT-TODA, niklaro nga aduna sila’y kondisyon sa upat nga kinahanglan una sila motambong sa after care program sa siyudad sulod a 90 ka adlaw.
Matud ni dela Peña nga siya mismo ang manghingusog sa paghangyo sa ilang mga labaw nga ang iyang kanhi sakop makabalik sa serbisyo kon sila limpyo na gyud sa ginadiling drugas.
Sa pagsugod, ang unom nitambong sa programa apan nagkadugay usa na lang ang nipadayon samtang ang lima wala na nipatim-aw.
Si dela Peña nitataw nga depende na lang gyud kini sa iyang mga kanhi sakop kon unsa ang gusto nilang mahitabo sa ilang kinabuhi basta sila nitabang lang nga mausab ang ilang kinabuhi tungod kay wala’y kaayuhan ang mahatag sa ilegal nga drugas.
Asoy pa niya nga gihulipan na dayon niya ang nawagtang niyang mga sakop aron dili sab maparalisar ang ilang operasyon sa pagpahapsay sa mga sakyanan nga mag-agian sa dakbayan. (BANAT NEWS)
- Latest