P1M shabu, 20 tawo sikop

CEBU, Philippines - Kapin P1 Milyon nga drugas ang nasakmit samtang 20 ka tawo nga nalambigit sa ilegal nga drugas ang nasikop sa gipahigayon nga buwag nga mga buy-bust operations sa kapulisan sa Probinsiya sa Sugbo.

Sa siyam ka mga nasikop pito niini gikan sa operation sa Provincial Intelligence Branch ug Moalboal Police Stations sa Barangay Poblacion East, Saavedra, Sitio Tap-anan, Basdiot sa Moalboal.

 Ang mga nasikop mao ang mga High Value Targets nga sila si Joven Novela, alias Chong, 37; Eva Mae Bohol, 27,  pulos taga Sitio Tap-an, Barangay Basdiot, Moalboal. Nadakpan usab sila si Laurence Barbarano, 19; Jeremy Balbuena, 23; Renato Apostol Jr, 24; Rowell Harap,29; Jose Eyac Jr.

Nasakmit gikan kanila ang 85 gramos nga shabu nga mobalor og usa ka milyon ka pesos.

Laing nasikop sa may Barangay Bagacay, Sibonga  sila si Geofrey Sabayton, 38, ug Adolfo Dela Cruz, 43, parehong mga street level targets kinsa gireklamo sa ilang mga silingan ngadto sa kapolisan. Nakuha gikan sa mga dinakpan ang 3-medium size, 11 ka gamay nga putos sa gituohang shabu ug drug paraphernalia.

Sa operasyon sa Dakbayan sa Lapu-Lapu ug Consolacion, pito ka tawo usab ang nadakpan ug usa ang nakaeskapo. Ang nadakpan sa Presinto 4 sa Lapu-Lapu City Police Office (LLCPO) mao si Rusbel Pag-usara Tampus, alyas Bayot, 22, nga nakuhaan og 24 ka paketeng gidudahang shabu.  Laing nadakpan si Fernando Tampus Terol, 34, taga Zone Sudlot, Barangay Kalawisan sa Dakbayan sa Lapu-Lapu nga nasakmitan og unom ka paketeng shabu ug kalibre 38 nga armas ug mga bala. Nadakpan usab ang managsuong Jovannie Orongan, 26 ug Reynaldo Orongan, 33, taga Pool, Bankal sa maong dakbayan ug nasakmit gikan kanila ang usa ka medium size nga shabu ug usa ka gamay nga pakete uban sa P300 nga marked money.

Nasigpatan usab nila si Ella Garate, 33, nga naaktohang nangaser og masiao hinungdan ila usab gidakop.

Samtang sa District 6 sa Pulpogan, Consolacion nadakpan sila si Escana Sanchez Horides ,45, ug Gleciano Bellesa Cometa, 42, human nasakmitan og napulo ka putos nga shabu. Matud pa nga target unta sa kapolisan ang kapuyo ni Horidez nga si Jeffrey Micaros apan tulin kaayo kining nakadagan.

Samtang sa dakbayan sa Talisay, nadakpan sa Sitio Magay, Barangay Tanke sila si Armando Digal alyas Magu, 36, ug Lemuel Cabanes,35, pulos taga Sitio Rattan sa maong barangay ug nangakuhaan og 29 ka paketeng gidudahang shabu. (BANAT NEWS)