Parents brigade sa tunghaan ipaaktibo
CEBU, Philippines - Nipagawas og memorandum ang Department of Education (Dep-Ed) Provincial Schools Division ngadto sa mga publikong eskwelahan sa Sugbo sa pagpangandam sa hulga sa pagpamomba.
Matud ni Dr. Rhea Mar Angtud, ang provincial schools division superintendent, nga apil na niini ang pagpahigayon og evacuation sa mga bata sama sa drill nga himoon sa mga eskwelahan ingon man pagpa-aktibo sa parents brigade sa mga eskwelahan aron moapil sa pagbantay sa mga kadudahang tawo.
Bukas sab ang DepEd sa plano sa Provincial Disaster Risk Reduction and Management Office nga ipaubos sa training ang mga magtutudlo kabahin sa bomb identification o mga angay nga himoong pagpangandam kung adunay hulga sa bomba sa mga eskwelahan.
Niadtong niaging adlaw nabulabog ang Mambaling Night High School human usa ka ‘Diana Dela Cruz’ ang nag-post sa iyang Facebook account nga magbantay-bantay kay giingong dunay bomba sa maong tunghaan.
Daling nisusi si Konsehal Dave Tumulak sa maong insidente ug nahibaw-an nila kun kinsay responsable sa maong binuhatan.
Nagkanayon si Tumulak nga nakaseguro sila nga tinun-an gyud sa maong tunghaan ang nihimo niini apan nangayo sila og tabang sa mga magtutudlo gumikan kay ang account nga gigamit niini sa pag-post usa man ka ‘ghost account’ nga gihimo sa usa ka estudyante aron pagpanghadlok sa eskwelahan.
Samtang nasuta sab sa konsehal nga daghan na ang fraternities sa mga tunghaan hinungdan nga iyang giawhag ang mga magtutudlo nga ipatawag kini aron patabangon sa pagbantay sa seguridad sa mga tunghaan. (BANAT NEWS)
- Latest