Kapitolyo gipangitaan sa COA sa sumada sa P32M

CEBU, Philippines - Moabot ngadto sa kapin P32 Milyones nga pundo nga gibalhin ngadto sa mga non-government organization gikan sa probinsya sa Sugbo ang gipangita karon sa Commission on Audit (COA).

Base sa COA report, ang maong pundo nagpabilin nga uliquidated sukad pa niadtong December 31, 2016. Ang probinsya mibalhin og pundo alang sa 19 ka mga non-government organizations alang sa mga proyekto niini.

Base sa COA Circular nga kinahanglan sulod sa 60 ka adlaw human makompleto sa proyeko sa NGO o people’s organization (PO), mosumiter kini sa Final Fund Utilization Report nga gi-certify sa accountant ug aprubado sa presidente sa organisasyon.

Sa tubag sa pangulo sa Accounting Office sa Kapitolyo, Ramon Dumayac, siya nagkanayon nga ang probinsya wala na mohatag og cash advances sa mga NGOS nga wala makasumiter og liquidation reports. May demand letters ang Provincial Accounting Office ngadto sa mga POs/ NGOs sa mga wala pa nakaduso og sumada sa ilang pundong nahatag.

Rekomendasyon sa COA nga angay usab mohatag og periodic report ang mga organisasyon  hilabina sa proyekto niini nga gigamitan sa kwartang gihatag sa probinsya. (BANAT NEWS)