Kagawad, 117 tawo na drug bust

CEBU, Philippines - Tulo ka mga High Value Targets diin usa niini barangay kagawad ang nasikop sa managlahing buy-bust operations nga gipahigayon sa mga sakop sa Provincial Intelligence Branch ug Provincial Drug Enforcement Unit didto sa Catmon, Sibonga ug Alegria.

Ang nasikop nga barangay kagawad sa Barangay Catmondaan, Catmon mao si Irvin Ares Doños, 38,  kinsa gikatahong HVT level 2.

Si Doños nakuhaan og tunga sa bulto nga gituohang shabu nga mibalor na og P30 mil matud pa sa hepe sa Provincial Drug Enforcement Unit nga si PChief Insp. Rolan Aliser.

Matud pa sa hepe sa PIB nga si Supt. Joie Pacito Yape nga duha ka buwan nilang gipanid-an ang maong kagawad kinsa giingong mi-surrender na kaniadto sa Oplan Tokhang isip usa ka drug user apan mibalik sa pagpamaligya.

Ang kagawad kusganong nihimakak sa pasangil kaniya kay matud niini lima na ka buwan siyang mihunong sa maong bisyo ug aktibo na siya sa kampanya batok sa druga.

Samtang 115 ka mga tawo ang nasikop sa Oplan Pokemon sa kapulisan sa Dakbayan sa Sugbo sugod niadtong Miyerkules sa kaadlawon gamit ang tanang pwersa sa tanang police stations ug special units sa Cebu City Police Office.  Sa 115 nga mga nadakpan 48 niini nalambigit sa ilegal nga drugas, 28 kalapasan sa PD1602, usa tungod sa warrant of arrest, usa tungod sa pagpanglugos,ug 11 sa kalapasan sa RA 9287 samtang ang uban nasikop tungod sa mga nagkadaiyang kaso.

Matud pa ni Senior Inspector Narrolf Tan, deputy chief sa City Intelligence Branch nakasakmit sila og 142.79 gramos nga shabu mobalor og dul-an sa P1.7 Milyon, 17 ka marijuana sticks,  duha ka ampules sa nubain ug kagamitan sa pagsuyop og drugas, 47 ang naisyuhan og temporary operators permit, upat ka gambling machines , usa ka armas lakip ang bala, kutsilyo ug halin sa gituohang drugas nga mobalor og P4 mil.

Nasikop usab ang HVT level 3 nga si Cirilo Gervano, 42, kinsa nakuhaan og pipila ka paketeng gituohang shabu diin mikabat na og P60 mil. Laing nasikop mao ang usa ka Anthony Olivar Cayubit alyas 'Pagong' 37, igsuon sa usa ka kanhi pulis nga si PO2 Niel Cayubit sa Sitio Suba, Barangay Bahay, Sibonga.

Unang nadakpan ang kanhi polis pinasikad sa search warrant  ug nakuhaan og pipila ka drugas apan nakaikyas si Anthony adto hitaboa.

Duha ka bultong shabu ang nasakmit sa dinakpan nga mokabat P118 mil ang kantidad.

Samtang 40 ka mga barangay sa lalawigan sa Sugbo ang opisyal nga gideklarar nga drug cleared barangays sa anti-drug oversight committee sa Probinsya sa Sugbo gikan sa San Remigio ug sa Dakbayan sa Bogo. (BANAT NEWS)