Kanhi Cebuano mediaman gidakop didto sa Pasay City

CEBU, Philippines - Ang kanhi   mediaman ug nikandidato pagkagobernador sa Sugbo nga si Roliveth “Boyet” Cortes, 52, nga mas nailang “Klasmeyt”  gidakop sa mga otoridad ug gibalhog sa bilanggoan sa Bureau of Customs didto sa kaulohan.

Gikompirmar ni SPO4 Wirlo Gatoc sa CIDG-Caloocan City atol sa exclusive interview sa dyLA nga nadakpan si Cortes kauban ang usa ka Cecilia Lucentales, 62.

Sila gikatahong nadakpan sa gihimong entrapment operation diha sa usa ka condominium unit sa Gil Puyat Avenue sa Pasay City alas 8:05 sa nakalabay nga gabii.

Sumala pa sa maong report, tulo ka mga tawo lakip ang taga Bureau of Customs ug civilian complainant ang mireklamo batok kang Cortes tungod kay matud pa nagpakaaron-ingnon kini nga taga Customs.

Sigon sa pasangil, nangayo kini og P50 mil nga kwarta sa usa sa mga reklamante bugti nga tabangan kining makasulod og trabaho. Wala hinuon hinganli ni Gatoc ang reklamante.

Matud pa nga dihang gidawat ang kwarta didto na gidakop sa mga sakop sa CIDG Caloocan, mga operatiba sa Bureau of Customs ug ubang unit sa kapolisan silang Cortes ug Lucentales.

Kasong estafa ug usurpation of authority nga kaso ang giandam batok sa duruha.

Si Cortes nakatrabaho sa radio ug telebisyon kaniadto isip tigbalita ug komentarista. Nahimo usab siyang host sa programa sa telebisyon nga Let's Do Business ug midagan pagka gobernador sa Sugbo niadtong tuig 2013 ug 2016 apan napildi. (BANAT NEWS)