Magtiayon gitusak og bala

CEBU, Philippines - Natusak-tusak sa bala ang lawas sa managtiayon human sila gipamusil samtang sila nangatulog diha sa ilang barong-barong sa Sitio Tunga, Barangay Tanke, Dakbayan sa Talisay kagahapon sa kaadlawon.

Ang mga biktima mao sila si John Augustin Abesia, 36, lumad nga taga Pandanon, Island ug si Gerlyn Abesia, 35.

Ang 15-anyos nga anak sa magtiayon maoy nakadiskubre sa gidangatan sa mga ginikanan niini dihang iyaha untang gipamukaw kay pangayoan niya og bawon kay moeskuyla na kini.

Nakurat na lang kini nga nagbuy-od na ang iyang inahan sa yuta samtang ang iyang amahan naa ra sa katre ug ang duha                  pulos nagkadugo ug patay na.

Si Konsehal Randy Gavas sa Barangay Tanke nibutyag nga wala gyuy nakakita sa mga mamumuno tungod sa kakusog sa uwan ingon man ang ilang nadungog mao ra man ang buto sa armas.

Ang mga nirespondeng polis nakakuha og pito ka kabhang sa bala sa .45 nga armas sa crime scene. Ang mga biktima nakaangkon og samad sa ilang nawong, ulo ug lawas hinungdan sa ilang kamatayon.

Si Gavas niingon nga dili badlungon ang bana samtang ang asawa lab-asera og isda. Ang bana job order nga kawani sa Talisay City Hall.

Apan si SPO1 Erwin Carbonquillo sa Talisay City Police Station nibutyag nga subay sa ilang imbestigasyon gidudahan nga police asset ang bana.

Apan walay operatiba sa TCPS ang miangkon nga ilaha kining impormante. Gituohang nakaila ang asawa sa killers maong giapil kini sa pagpusil.

Samtang patay usab ang 30 anyos nga lalaki human kini pusila sa wa pa mailhing mamumuno samtang natulog sulod sa ilang payag didto sa Sitio Lingatong, Barangay Vito, Balamban.

Nakaangkon og usa ka samad pinusilan sa walang bahin sa ulo ang biktima nga si Allan Casag Indab.

Si SPO2 Jose Ranielito Villarino mitug-an sa Banat News nga nakabantay na ang magtiayon nga adunay nilangkat sa ilang bungbong sa silong sa dayon nilang pangatulog apan wala nila panumbalinga.

Sunod na lang nga nahitabo ang nadungog nilang buto sa armas nga gikamatay sa biktima.

Nasuta nga gipalusot ra sa mamumuno ang sumbohan sa armas ngadto sa amakang bongbong diin pinakaduol sa gihigdaan ni Indab.

Usa sa ilang gitan-aw nga anggulo mao nga aduna kini nakabangi sa trabaho kaniadto.

(BANAT NEWS)