Piston molusad og nationwide protest

CEBU, Philippines - Ang militanteng grupo sa transportasyon, ang Pinagkaisang Samahan ng mga Tsuper at Operators Nationwide molusad og protesta tibuok nasud lakip na sa Cebu karong Lunes aron ilang ipadayag ang ilang dakung pagsupak sa Omnibus Franchising Guidelines nga giluwatan sa Land Transportation Franchising and Regulatory Board.

Matud pa ni Greg Perez, ang coordinator sa Piston-Cebu ilang sugdan ang martsa sa alas- 8 sa buntag gikan sa Fuente Osmeña padulong sa Colon St. ug sa Cebu City Hall.

Gibana-bana ni Perez nga adunay 200 ka mga jeepney drivers uban sa ilang support groups sama sa urban poor, kabataan ug kababayen-an ang moapil sa maong protesta. Nisaad hinoon si Perez nga wala silay plano nga iparalisa ang transportasyon.

Matud pa ni Perez nga ang maong OFG usa kini ka pamaagi aron gyud mawagtang ang mga jeepneys  nga moresulta sa pagkawagtang sa panginabuhian sa mga drivers.

Gawas nga gisupak nila ang OFG, moadto usab sila sa Cebu City Hall aron ilang ipalanog ang ilang pagsupak sa Bus Rapid Transit nga proyekto sa siyudad.

Ang OFG kabahin kini sa giimplimentar nga transport modernization program sa gobiyerno diin ang usa ka local government unit gitugotang momugma og kaugalingong Local Transport Route Plans nga rekisitos aron malibkas ang moratorium sa pag isyu og prangkisa. Sukad 2003, ang LTFRB niluwat og moratorium alang sa prangkisa sa buses, mini-buses, taxis ug jeepneys. (BANAT NEWS)